वडगाव मावळ पोलीस ठाण्याचे नवे निरीक्षक अभिजीत देशमुख यांनी कार्यभार सांभाळला
वडगाव मावळ / प्रतिनिधी : वडगाव मावळ पोलीस ठाण्याच्या पोलीस निरीक्षकपदी अभिजीत देशमुख यांची नियुक्ती करण्यात आली असून, त्यांनी गुरुवार (दि. ९ ऑक्टोबर) रोजी औपचारिकरित्या पदभार स्वीकारला आहे.
दरम्यान, विद्यमान पोलीस निरीक्षक कुमार कदम यांची बदली सासवड पोलीस ठाण्यात करण्यात आली आहे. या बदल्यांचे आदेश पुणे ग्रामीणचे पोलीस अधीक्षक संदीपसिंह गिल यांनी जारी केले असून, वडगाव मावळ विभागात नव्या नेतृत्वामुळे गुन्हेगारी नियंत्रणास नवी दिशा मिळेल, अशी अपेक्षा नागरिकांत व्यक्त होत आहे.
सेवेत उल्लेखनीय कारकीर्द
अभिजीत देशमुख हे सांगली जिल्ह्यातील तासगाव तालुक्यातील खुजगाव येथील रहिवासी आहेत. त्यांनी २००५ साली महाराष्ट्र राज्य पोलीस दलात उपनिरीक्षक म्हणून प्रवेश केला. आपल्या कारकीर्दीच्या प्रारंभी त्यांनी २००६ ते २००७ या काळात गडचिरोली जिल्ह्यात सेवा बजावली. नक्षलप्रभावित भागात कठीण परिस्थितीत काम करताना त्यांनी धैर्य, संयम आणि कर्तव्यनिष्ठेचे उत्कृष्ट उदाहरण घालून दिले.
यानंतर देशमुख यांनी पुणे ग्रामीणमधील विविध ठाण्यांमध्ये कार्य करताना गुन्हे उकल, वाहतूक नियंत्रण आणि सामाजिक जनजागृती मोहिमा यामध्ये सक्रिय सहभाग नोंदवला आहे. त्यांच्या कारकिर्दीत त्यांनी अनेक गुन्ह्यांची यशस्वी उकल केली असून, गुन्हेगारीविरोधी कारवाईसाठी ते ओळखले जातात.
स्थानिकांकडून स्वागत
वडगाव मावळ परिसरातील सामाजिक संस्थांनी आणि नागरिकांनी नव्या पोलीस निरीक्षकांचे स्वागत केले आहे. “अभिजीत देशमुख हे संयमी, नागरिकाभिमुख अधिकारी आहेत. त्यांच्या नेतृत्वाखाली वडगाव मावळ ठाण्याची कार्यशैली अधिक पारदर्शक आणि परिणामकारक होईल,” असे मत स्थानिकांनी व्यक्त केले.
पुढील काळात वाढत्या औद्योगिक आणि शहरी विस्तारासोबत कायदा-सुव्यवस्थेचे आव्हान मोठे असताना, नव्या निरीक्षकांकडून दक्ष आणि प्रभावी पोलिसी कामगिरीची अपेक्षा नागरिकांकडून व्यक्त केली जात आहे.
