शिवज्योत आणण्यासाठी निघालेल्या तरुणांवर काळाचा घाला; भीषण अपघातात दोघांचा जागीच मृत्यू
मावळ : मावळ तालुक्यातील आंदर मावळ परिसरातील शिंदे घाटेवाडी येथील शिवजयंती तरुण मंडळाचे कार्यकर्ते विसापूर किल्ल्यावरून शिवज्योत आणण्यासाठी जात असताना झालेल्या भीषण अपघातात दोन जणांचा जागीच मृत्यू झाल्याची दुर्दैवी घटना घडली. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, शिंदे घाटेवाडी येथील शिवजयंती तरुण मंडळाचे काही कार्यकर्ते पारंपरिक पद्धतीने विसापूर किल्ल्यावरून शिवज्योत आणण्यासाठी दुचाकीवरून रवाना झाले होते. दरम्यान, पुणे–मुंबई महामार्गावरील नायगाव येथील लक्ष्मीनारायण मंगल कार्यालयासमोर MH 14 JA 5111 क्रमांकाच्या शिफ्ट कारने त्यांच्या दुचाकीला जोरदार धडक दिली.
धडक इतकी भीषण होती की दुचाकीवरील दर्शन बाबू शिंदे (वय १५) आणि ओमकार दत्ता आढळे (वय २३) हे दोघे गंभीर जखमी झाले. अपघाताच्या तीव्रतेमुळे दोघांचाही जागीच मृत्यू झाला. या घटनेची माहिती मिळताच स्थानिक नागरिक आणि पोलिसांनी तात्काळ घटनास्थळी धाव घेतली.
दरम्यान, अपघातानंतर परिसरात मोठी गर्दी झाली होती. पोलिसांनी पंचनामा करून मृतदेह पुढील कार्यवाहीसाठी रुग्णालयात पाठवले असून या घटनेचा अधिक तपास सुरू आहे.
शिवजयंती उत्सवासाठी शिवज्योत आणण्याच्या पवित्र कार्यासाठी निघालेल्या तरुणांचा असा दुर्दैवी अंत झाल्याने शिंदे घाटेवाडी तसेच संपूर्ण आंदर मावळ परिसरावर शोककळा पसरली आहे. गावातील तरुण, ग्रामस्थ आणि शिवभक्तांनी या घटनेबद्दल तीव्र हळहळ व्यक्त केली आहे.
