श्रीक्षेत्र देहू ते श्रीक्षेत्र भंडारा डोंगर बससेवेचा शुभारंभ
भाविकांसाठी दिलासादायक पाऊल – दिवसातून सात फेऱ्या धावणार
श्रीक्षेत्र देहू : वारकरी भाविक आणि नागरिकांच्या सोयीसाठी पुणे महानगर परिवहन महामंडळ (PMPML) तर्फे श्रीक्षेत्र देहू ते श्रीक्षेत्र भंडारा डोंगर या नव्या बससेवेचा शुभारंभ करण्यात आला आहे. संत तुकाराम महाराजांची जन्मभूमी व कर्मभूमी असलेल्या पवित्र देहूनगरीपासून त्यांच्या तपोभूमी असलेल्या भंडारा डोंगरापर्यंत प्रवास सोयीस्कर करण्यासाठी ही महत्त्वपूर्ण सेवा सुरू झाली आहे.
राज्याच्या कानाकोपऱ्यातून वर्षभर भाविक देहू, आळंदी व भंडारा डोंगर येथे दर्शनासाठी येत असतात. आतापर्यंत भाविकांना भंडारा डोंगरावर जाण्यासाठी तीस ते चाळीस मिनिटांचा पायी प्रवास करावा लागत होता. त्यामुळे वयोवृद्ध, महिला आणि लहान मुलांना मोठा त्रास सहन करावा लागत असे. नव्या बससेवेच्या माध्यमातून या सर्वांना मोठा दिलासा मिळणार असून प्रवास आता सोपा आणि सुरक्षित होणार आहे.
या मार्गावर दिवसभरात एकूण सात फेऱ्या धावणार आहेत. त्यामुळे वारकरी व भाविकांना वेळेवर प्रवासाची सुविधा उपलब्ध होणार असून एकाच दिवशी दोन्ही तीर्थक्षेत्रांचे दर्शन घेण्याची संधी सुलभ झाली आहे.
या नव्या बससेवेचा शुभारंभ पंतप्रधान नरेंद्र मोदी यांच्या वाढदिवसानिमित्त करण्यात आला. उद्घाटन प्रसंगी जिल्हा बँकेचे अध्यक्ष माऊली दाभाडे, मावळ भाजप नेते रविंद्र भेगडे आणि भंडारा डोंगर संस्थांचे अध्यक्ष ह.भ.प. बाळासाहेब महाराज काशीद यांच्या उपस्थितीत हिरवा झेंडा दाखवून बससेवेचे लोकार्पण करण्यात आले.
या उपक्रमामुळे भाविक व नागरिकांमध्ये समाधान आणि आनंदाचे वातावरण पाहायला मिळत आहे. धार्मिक पर्यटनाला चालना मिळून देहू व भंडारा डोंगर या तीर्थक्षेत्रांचा आध्यात्मिक व सामाजिक महत्त्वाचा प्रवाह अधिक गतिमान होईल, अशी भावना व्यक्त होत आहे.
प्रतिनिधी – गणेश नामदेव भेगडे (मो. ९९२१८०७०११)
