श्री क्षेत्र घोरवडेश्वर डोंगरावरून १६ वर्षीय मुलगी दरीत पडली
शेलारवाडी (ता. मावळ) : मावळ तालुक्यातील प्राचीन आणि ऐतिहासिक घोरवडेश्वर डोंगरावर मंगळवार दिनांक २६ ऑगस्ट २०२५ रोजी सकाळी ११ वाजण्याच्या सुमारास एक दुर्दैवी घटना घडली. दर्शनासाठी आपल्या पालकांसह आलेली १६ वर्षीय मुलगी पाय घसरून तब्बल ७० ते ८० फूट खोल दरीत कोसळली. अचानक घडलेल्या या प्रकारामुळे तेथे एकच खळबळ उडाली.
घटना कळताच श्री क्षेत्र घोरवडेश्वर देवस्थानचे महंत अमरनाथ बाबा यांनी कोणतीही वेळ न दवडता थेट दरीत उतरून मोठे धाडस दाखवले. मुलीच्या हाता-पायांना किरकोळ दुखापत झाली होती आणि पडल्यामुळे ती स्वतः वर येऊ शकत नव्हती. मात्र अमरनाथ बाबा यांनी सर्व धोका पत्करून त्या मुलीपर्यंत पोहोचत तिला सुरक्षित वर आणले.
यावेळी अमरनाथ बाबांना घोरवडेश्वर देवस्थानचे पुजारी हरी महाराज बोडके, पुरातत्व विभागाचे कर्मचारी संदीप पडवळ व रोहित कुमार, शिवभक्त नंदकुमार बोडके व त्यांचा मुलगा, तसेच प्रसाद कोळी यांनी प्रत्यक्ष मदत केली. सर्वांच्या मदतीने मुलगी सुखरूपपणे दरीतून बाहेर आली.
धाडसी बचावकार्य पाहून उपस्थित भाविकांनी आणि मुलीच्या पालकांनी अमरनाथ बाबा यांचे मनःपूर्वक आभार मानले. “तुमच्यामुळे आमची मुलगी सुखरूप आम्हाला मिळाली,” अशा शब्दांत त्यांनी कृतज्ञता व्यक्त केली.
प्रतिनिधी : गणेश नामदेव भेगडे (मो. ९९२१८०७०११)
