गँगस्टर रवी पुजारी च्या मावळ मधील शूटरला पिंपरी पोलिसांनी केली अटक
पिंपरी : येथे एका व्यावसायिक तरुणावर गोळीबार करणाऱ्या आरोपीला पिंपरी-चिंचवड गुन्हे शाखेच्या मालमत्ता गुन्हे विरोधी पथकाने अटक केली. हा आरोपी कुख्यात गुन्हेगार रवी पुजारी याच्या टोळीचा सदस्य असल्याचे तपासात समोर आले आहे. या आरोपीने यापूर्वी सहा वेळा गोळीबार केला असून बांधकाम व्यावसायिकांना टार्गेट करण्याचा त्याचा गुन्हेगारी पॅटर्न आहे.
चिंचवड परिसरातून मोटारसायकल चोरी करून त्याने पिंपरीत येथे गुन्हा केला होता. पैशाची चणचण भासल्याने त्याने हे कृत्य केल्याची कबुली दिली आहे. रविंद्र भाऊसाहेब घारे (४०, रा. ताम्हाणे वस्ती, टॉवर लाईन, चिखली, मुळगाव ओझर्डे, मावळ) असे अटक करण्यात आलेल्या आरोपीचे नाव आहे.शुक्रवार दिनांक १ ऑगस्ट २०२५ रोजी दुपारी काळ्या रंगाच्या मोटारसायकलवरून आलेला आरोपी “दस वाला फ्रुटी दे” असे म्हणत पिंपरी येथील दुकानात घुसला. व्यापारी तरुण फ्रिजमधून फ्रुटी देत असताना रवींद्र याने तरुणाच्या गळ्यातील सोनसाखळी हिसकावण्याचा प्रयत्न केला. साखळी न तुटल्याने आरोपीने पिस्तूल दाखवत धमकावले आणि पुन्हा साखळी ओढली. अर्धी साखळी मिळाल्यानंतर उर्वरित मिळवण्यासाठी त्याने पिस्तूलने तरुणावर गोळी झाडली. यामध्ये तरुण गंभीर जखमी झाला.
या गुन्ह्याचा समांतर तपास करत असताना मालमत्ता गुन्हे विरोधी पथकाने तब्बल ७०० हून अधिक सीसीटीव्ही फुटेज तपासले. आरोपीने हेल्मेट, रेनकोट घालून तसेच मोबाईल न वापरता पोलिसांची दिशाभूल करण्याचा प्रयत्न केला होता. मात्र, तरीही शरीरयष्टीवरून ओळख पटवत ६ ऑगस्ट रोजी चिखली येथून आरोपीला अटक करण्यात आली. त्याच्याकडे केलेल्या तपासात अनेक मोठे खुलासे झाले आहेत. आरोपी घारे हा रवी पुजारी व सुरेश पुजारी टोळीचा सदस्य असून सुपारी घेऊन खंडणी, खून, जबरी चोरी करणारा शार्पशूटर आहे.
नवी मुंबईतील बांधकाम व्यावसायिकावर गोळीबार प्रकरणी मोक्का अंतर्गत कारवाई झाल्यानंतर तो फरार होता. त्याच्यावर खून, खुनाचा प्रयत्न, खंडणी, जबरी चोरी, वाहनचोरी व गोळीबार असे २५ गंभीर गुन्हे नोंद आहेत.अटकेनंतर पोलिसांनी त्याच्याकडून १० ग्रॅम सोन्याची चैन, एक देशी पिस्तूल, ११ जिवंत काडतुसे, दोन दुचाकी पोलिसांनी हस्तगत केल्या आहेत. या कारवाईमुळे चिंचवड, एमआयडीसी भोसरी व वडगाव मावळ येथील वाहनचोरीचे आणखी तीन गुन्हे उघड झाले आहेत.ही कारवाई वरिष्ठ पोलीस निरीक्षक विजय ढमाळ, सहायक पोलीस निरीक्षक दतात्रय गुळीग, सहायक पोलीस निरीक्षक पांडुरंग देवकाते, सहायक पोलीस निरीक्षक गोरक्षनाथ बालवडकर, पोलीस अंमलदार महेश खांडे, सोमनाथ मोरे, मोहसीन आत्तार, अमोल गोरे, विशाल गायकवाड, चंद्रकांत गडदे, नितीन उमरजकर, गणेश सावंत, सुमित देवकर, पवन वाजे, समीर रासकर, अमर कदम, नितीन लोखंडे, विनोर वीर, गणेश हिंगे, प्रवीण कांबळे, ज्ञानेश्वर कोलगे, गणेश कोकणे, हर्षद कदम, औदुंबर रोंगे यांनी केली.
प्रतिनिधी =गणेश नामदेव भेगडे. ९९२१८०७०११
