सकल मराठा समाजाचा मुंबई दौरा : मावळ तालुक्यातील नियोजन बैठक पार पडली
देहू (प्रतिनिधी) : सकल मराठा समाज पुणे जिल्हा व मावळ तालुक्याच्या वतीने निस्वार्थी मराठा समाज योद्धा मनोज जरांगे पाटील व महाराष्ट्रातील तमाम मराठा सेवकांच्या भव्य मुंबई दौऱ्याचे स्वागत करण्यासाठी मावळ तालुक्यात उत्साहाचे वातावरण पाहायला मिळाले.
पुणे व मावळातून निघणाऱ्या या रॅलीचे स्वागत भव्य-दिव्य पद्धतीने करण्याचा निर्णय घेण्यात आला असून, त्यासाठी मावळ तालुक्यातील प्रत्येक नागरिकाने या रॅलीसोबत मुंबई गाठण्याचे आवाहन करण्यात आले आहे.
या पार्श्वभूमीवर जगद्गुरु श्री संत तुकाराम महाराज गाथा मंदिर शेजारील अभंग मंगल कार्यालय, देहू येथे निर्णायक नियोजन बैठक पार पडली. या बैठकीत मावळ तालुक्यासह पुणे जिल्ह्यातील मोठ्या संख्येने मराठा समाज बांधव उपस्थित होते.
बैठकीदरम्यान रॅलीसाठी स्वागत कमिटी, वाहनांची व्यवस्था, युवक-युवतींचा सहभाग, महिला मंडळाचा उत्स्फूर्त सहभाग तसेच शिस्तबद्ध पद्धतीने मुंबईकडे कूच करण्याबाबत ठोस निर्णय घेण्यात आले. समाजातील मान्यवरांनी मनोज जरांगे पाटील यांच्या नेतृत्वाखालील मराठा समाज आंदोलनाला भक्कम पाठिंबा देण्याची ग्वाही यावेळी दिली.
या बैठकीला पुणे व मावळ परिसरातील शेकडो मराठा सेवकांनी उत्स्फूर्त प्रतिसाद दिला. रॅलीच्या माध्यमातून मराठा समाजाचे ऐक्य, ताकद आणि हक्काच्या लढ्याला न्याय मिळवून देण्यासाठी सर्वांनी एकदिलाने काम करण्याचा निर्धार व्यक्त केला.
