पै. सारंग थोरवेचे सुवर्ण यश
आंतरविद्यापीठ कुस्ती स्पर्धेत ८७ किलो गटात विजेतेपद मिळवत चंदिगड येथे होणाऱ्या ऑल इंडिया नॅशनल कुस्ती स्पर्धेसाठी निवड
मावळ : पुणे शहरात नुकत्याच पार पडलेल्या आंतरविद्यापीठ कुस्ती स्पर्धेत पैलवान सारंग बाळासाहेब थोरवे यांनी अत्यंत दमदार खेळ करून सुवर्णपदकावर आपले नाव कोरले. ८७ किलो वजन गटातील स्पर्धेत थोरवे यांनी प्रतिस्पर्ध्यांना चित्तपट करत अंतिम सामन्यात विजय मिळवला आणि सुवर्णपदक आपल्या नावावर केले.
या भव्य यशामुळे त्यांची चंदिगड येथे होणाऱ्या ऑल इंडिया युनिवर्सिटी नॅशनल कुस्ती स्पर्धेसाठी निवड झाली आहे. या निवडीमुळे मावळ तालुक्याचा क्रीडा विश्वात लौकिक वृद्धिंगत झाला आहे.
या उल्लेखनीय यशाबद्दल क्रीडाप्रेमी व समाजातील मान्यवरांनी पै. थोरवे यांचे कौतुक केले. विशेष म्हणजे गणेश गोविंद ढोरे, अंकुश तुमकर व बाळासाहेब तुमकर यांनी थोरवे यांना शुभेच्छा देत पुढील स्पर्धेसाठी प्रोत्साहन दिले.
पै. सारंग थोरवे यांनी मिळवलेले हे यश केवळ वैयक्तिक नसून परिसरातील युवकांसाठी प्रेरणादायी आहे. मावळच्या कुस्ती परंपरेला नवा सन्मान मिळवून देत त्यांनी आपल्या मेहनतीने आणि चिकाटीने विजय संपादन केला.
