सह्याद्री नामा रविवार दि. ३० ऑगस्ट २०२६
कामशेत ग्रामीण पत्रकार संघाच्या वतीने ‘अखंड वारी जीवन गौरव पुरस्कार-२०२६’ सोहळा उत्साहात संपन्न
कामशेत : ऊन, वारा, पाऊस आणि अनेक अडचणींची पर्वा न करता वर्षानुवर्षे पंढरीच्या वाटेवर पायी चालत, मुखी अखंड विठ्ठलनामाचा गजर आणि हृदयात भक्तीचा दीप तेवत ठेवणाऱ्या ज्येष्ठ वारकऱ्यांच्या त्याग, समर्पण आणि भक्तीला समाजाच्या वतीने कृतज्ञतेची मानवंदना देण्यात आली. कामशेत ग्रामीण पत्रकार संघ, मावळ यांच्या वतीने आयोजित ‘अखंड वारी जीवन गौरव पुरस्कार-२०२६’ सोहळा शनिवार, दि. २९ ऑगस्ट रोजी नायगाव, कामशेत येथील गुरुदत्त मंगल कार्यालयात भक्तिमय आणि भावस्पर्शी वातावरणात उत्साहात पार पडला.
पवनमावळ, नाणे मावळ आणि अंदर मावळ परिसरातील वारीची अखंड परंपरा जपणाऱ्या १५ ज्येष्ठ वारकरी महाराजांचा ‘अखंड वारी जीवन गौरव पुरस्कार’ देऊन सन्मान करण्यात आला. आयुष्याची अनेक दशके विठ्ठलभक्तीला समर्पित करणाऱ्या या वारकऱ्यांचा सन्मान होत असताना उपस्थितांमध्येही भावनिक वातावरण निर्माण झाले.
या पुरस्काराने सन्मानित करण्यात आलेल्या वारकऱ्यांमध्ये ह.भ.प. भिकाजी धोंडू ठाकर, ह.भ.प. भागूजी महाराज ठोंबरे, ह.भ.प. भगवान महाराज लोखंडे, ह.भ.प. सोपान महाराज येणपुरे, ह.भ.प. रघुनाथ वाघुजी आडकर, ह.भ.प. सदाशिव जगताप, ह.भ.प. शंकर महाराज शिरसट, ह.भ.प. भाऊसाहेब महाराज टाकळकर, ह.भ.प. संभाजी भानुसघरे, ह.भ.प. भरत महाराज गायकवाड, ह.भ.प. रामचंद्र महाराज आलम, ह.भ.प. भागोजी महाराज करांडे, ह.भ.प. सिताराम महाराज तनपुरे, ह.भ.प. महादू महाराज कुटे, ह.भ.प. दत्तोबा महाराज मालपोटे आणि ह.भ.प. प्रकाश महाराज शिंदे यांचा गौरव करण्यात आला.
विविध क्षेत्रातील मान्यवरांचाही गौरव
यावेळी वारी आणि सामाजिक कार्यात उल्लेखनीय योगदान देणाऱ्या व्यक्ती व संस्थांचाही विशेष सन्मान करण्यात आला. मरणोत्तर जीवन गौरव पुरस्कार स्व. सुकनजी बाफना, ‘वारी सेवा रत्न पुरस्कार’ डॉ. विकेश मुथा, ‘गोमाता रक्षण वीर पुरस्कार’ पवन ढेरेगे, तर ‘विशेष कार्य गौरव पुरस्कार’ सह्याद्री विद्यार्थी अकादमी व सह्याद्री प्रतिष्ठान मावळ यांना प्रदान करण्यात आला.
वारीच्या माध्यमातून समाजात अध्यात्म, समता, बंधुभाव आणि माणुसकीचा संदेश पोहोचविणाऱ्या वारकरी परंपरेचा गौरव करणारा हा उपक्रम असल्याने उपस्थितांनी कामशेत ग्रामीण पत्रकार संघाच्या या उपक्रमाचे कौतुक केले.
मान्यवरांची उपस्थिती
कार्यक्रमास उद्योजक शंकरराव शेळके, माजी सभापती गुलाबराव म्हाळस्कर, डॉ. विकेश मुथा, ह.भ.प. दत्तात्रय लालगुडे, प्रदेश उपाध्यक्ष विवेक इनामदार, कुंभार समाजाचे जिल्हाध्यक्ष संतोष कुंभार, मराठी पत्रकार संघाचे तालुकाध्यक्ष रामदास वाडेकर, माजी उपसरपंच गजानन शिंदे, भाजपाचे मंडल अध्यक्ष अभिमन्यू शिंदे, उद्योजक हर्षद गरुड, ह.भ.प. दत्तात्रय शिंदे, विमल मोहन वाघमारे आणि सुनीलजी रहाटे आदी मान्यवरांची प्रमुख उपस्थिती होती.
कार्यक्रमादरम्यान मान्यवरांच्या हस्ते ज्येष्ठ वारकऱ्यांचा शाल, श्रीफळ आणि सन्मानचिन्ह देऊन गौरव करण्यात आला. आपल्या आयुष्याचा मोठा कालखंड विठ्ठलनामाला आणि वारीच्या परंपरेला समर्पित करणाऱ्या वारकऱ्यांचा सन्मान होत असल्याने कार्यक्रमाला विशेष महत्त्व प्राप्त झाले.
पत्रकार संघाच्या पदाधिकारी, सदस्यांचे परिश्रम
या सोहळ्याच्या यशस्वी आयोजनासाठी कामशेत ग्रामीण पत्रकार संघाचे अध्यक्ष चेतन वाघमारे, उपाध्यक्ष प्रफुल्ल ओव्हाळ, सचिव उत्तम ठाकर, सल्लागार सुभाष भोते, सल्लागार सचिन शिंदे, संघटक अनिल घारे, खजिनदार शिवानंद कांबळे, पत्रकार परिषद प्रमुख मंगेश आखाडे, ज्ञानेश्वर वाघमारे, संकेत जगताप, सागर शिंदे, विशाल कुंभार आणि दिलीप कांबळे यांच्यासह संघाच्या पदाधिकारी व सदस्यांनी विशेष परिश्रम घेतले.
वारी म्हणजे महाराष्ट्राच्या संस्कृतीचा अखंड प्रवाह
वारी ही केवळ पंढरपूरकडे जाणारी पाऊलवाट नसून महाराष्ट्राच्या संस्कृतीचा, समतेचा, बंधुभावाचा आणि माणुसकीचा अखंड प्रवाह आहे. या परंपरेला आपल्या आयुष्याची अनेक वर्षे अर्पण करणाऱ्या ज्येष्ठ वारकऱ्यांचा सन्मान म्हणजे त्यांच्या भक्तीला आणि सामाजिक योगदानाला समाजाने दिलेली कृतज्ञतेची पावती असल्याची भावना यावेळी व्यक्त करण्यात आली.
अनेक दशकांपासून वारीची परंपरा जपत पुढच्या पिढीलाही भक्ती, सेवा आणि समतेचा संदेश देणाऱ्या ज्येष्ठ वारकऱ्यांचा सन्मान झाल्याने ‘अखंड वारी जीवन गौरव पुरस्कार-२०२६’ हा सोहळा मावळच्या वारकरी परंपरेतील एक संस्मरणीय उपक्रम ठरला.
कार्यक्रमास वारकरी, पत्रकार, सामाजिक कार्यकर्ते, विविध क्षेत्रातील मान्यवर तसेच नागरिक मोठ्या संख्येने उपस्थित होते.
