पिंपरी चिंचवडमध्ये प्रथमच भव्य अश्वारोहण स्पर्धा; शंभरहून अधिक खेळाडूंचा सहभाग
पिंपरी :पिंपरी चिंचवड शहरात प्रथमच घोडेस्वारी प्रेमींसाठी एक आगळावेगळा उपक्रम राबविण्यात येत आहे. इक्वेस्टेरियन असोसिएशन ऑफ पिंपरी चिंचवड आणि आमदार उमाताई खापरे यांच्या संयुक्त विद्यमाने शहरात पहिलीच अश्वारोहण (घोडेस्वारी) स्पर्धा मोठ्या उत्साहात आयोजित करण्यात आली आहे. ही स्पर्धा ८ व ९ नोव्हेंबर या दोन दिवसांदरम्यान संत तुकाराम नगर येथील डॉ. बाबासाहेब आंबेडकर मैदानावर पार पडणार आहे.
या स्पर्धेत महाराष्ट्रातील तसेच देशातील विविध भागांतील शंभराहून अधिक अश्वारोही खेळाडू सहभागी होणार असल्याची माहिती आयोजकांनी दिली आहे. स्पर्धेत ड्रेसाज, शो जंपिंग, टेंट पेगिंग, एंड्युरन्स रायडिंग यांसारख्या विविध अश्वारोहण प्रकारांचा समावेश करण्यात आला आहे. अशा प्रकारच्या तांत्रिक आणि शिस्तबद्ध खेळामुळे तरुण पिढीला नवीन खेळांच्या माध्यमातून आत्मविश्वास आणि शारीरिक तंदुरुस्तीचा संदेश दिला जाणार आहे.
स्पर्धेचा उद्घाटन सोहळा ८ नोव्हेंबर रोजी सकाळी १० वाजता आयोजित करण्यात आला असून, शहरातील मान्यवर, लोकप्रतिनिधी आणि क्रीडा प्रेमी या वेळी उपस्थित राहणार आहेत. तर बक्षीस वितरण समारंभ ९ नोव्हेंबर रोजी संध्याकाळी ७ वाजता होईल. विजेत्या खेळाडूंना आकर्षक पारितोषिके आणि ट्रॉफी देण्यात येणार आहेत.
पिंपरी चिंचवड सारख्या औद्योगिक शहरात प्रथमच अशा प्रकारची क्रीडा स्पर्धा होत असल्याने नागरिकांमध्ये उत्सुकता निर्माण झाली आहे. याआधी शहरात मुख्यतः क्रिकेट, फुटबॉल, कबड्डी किंवा मॅरेथॉन अशा खेळांचे आयोजन होत असले तरी, घोडेस्वारीसारख्या शिस्तबद्ध आणि रोमांचक खेळाचा प्रत्यक्ष अनुभव घेण्याची ही दुर्मीळ संधी नागरिकांना मिळणार आहे.
या स्पर्धेद्वारे तरुणाईला खेळात विविधता आणण्याचा आणि ग्रामीण तसेच शहरी खेळाडूंना एक समान व्यासपीठ देण्याचा प्रयत्न होत असल्याचे इक्वेस्टेरियन असोसिएशनचे अध्यक्ष राजेश भुजबळ यांनी सांगितले. “शहरवासीयांनी मोठ्या संख्येने उपस्थित राहून या रोमांचक क्रीडा सोहळ्याचा आनंद घ्यावा,” असे आवाहन त्यांनी केले आहे.
घोडेस्वारी हा केवळ खेळ नसून, तो आत्मविश्वास, नियंत्रण आणि समन्वय यांचा संगम असल्याचे आयोजकांचे मत आहे. पिंपरी चिंचवडच्या क्रीडाक्षेत्रात नवा अध्याय लिहिणारी ही अश्वारोहण स्पर्धा शहराच्या क्रीडासंस्कृतीला नवे वळण देणारी ठरणार आहे.
प्रतिनिधी=गणेश नामदेव भेगडे.मो९९२१८०७०११
