सह्याद्री नामा
शुक्रवार दि २० ऑगस्ट २०२६
लोणावळ्यातील ‘ग्लास स्कायवॉक’ प्रकल्पाला गती; आमदार सुनील शेळके यांच्या पाठपुराव्याला यश
निविदा मसुदा अंतिम; मावळच्या पर्यटन विकासाला मिळणार नवी झेप
मावळ | प्रतिनिधी मावळ तालुक्याच्या पर्यटन विकासाच्या दृष्टीने महत्त्वाकांक्षी मानल्या जाणाऱ्या लोणावळ्यातील बहुप्रतीक्षित ‘ग्लास स्कायवॉक’ प्रकल्पाला आता प्रत्यक्ष गती मिळाली आहे. कुरवंडे परिसरातील टायगर आणि लायन्स पॉईंट येथे प्रस्तावित सुमारे १२५ मीटर लांबीच्या या प्रकल्पाच्या निविदेचा मसुदा अंतिम करण्यात आला असून, पुढील निविदा प्रक्रिया सुरू करण्याचा मार्ग मोकळा झाला आहे. त्यामुळे गेल्या काही काळापासून चर्चेत असलेल्या या प्रकल्पाच्या प्रत्यक्ष उभारणीच्या दिशेने महत्त्वाचे पाऊल पडले आहे.
या प्रकल्पासाठी आमदार सुनील शेळके यांनी सातत्याने शासनस्तरावर पाठपुरावा केला आहे. मावळच्या पर्यटन क्षमतेला व्यापक व्यासपीठ मिळावे, लोणावळा-खंडाळ्याच्या पर्यटन क्षेत्राला नवे आकर्षण निर्माण व्हावे आणि त्यातून स्थानिकांना रोजगाराच्या संधी उपलब्ध व्हाव्यात, या उद्देशाने त्यांनी या प्रकल्पासाठी प्रयत्न केले. स्वर्गीय अजितदादा पवार यांच्या माध्यमातून प्रकल्पाला मंजुरी मिळवून देण्यासाठी करण्यात आलेल्या प्रयत्नांना आता मूर्त स्वरूप मिळत असल्याचे चित्र आहे.
निविदा प्रक्रियेला हिरवा कंदील
सार्वजनिक-खासगी भागीदारी अर्थात पीपीपी तत्त्वावर हा प्रकल्प उभारण्यात येणार आहे. प्रकल्पाची निविदा प्रक्रिया पुढे नेण्यासाठी पुणे महानगर प्रदेश विकास प्राधिकरण (पीएमआरडीए) आणि संबंधित यंत्रणांकडून कार्यवाही सुरू आहे.
पिंपरी-चिंचवड येथील कार्यालयात झालेल्या निविदा छाननी समितीच्या बैठकीत निविदा मसुद्यावर सविस्तर चर्चा करण्यात आली. त्यानंतर आवश्यक कार्यवाही पूर्ण करून निविदा प्रक्रिया सुरू करण्याच्या दृष्टीने महत्त्वाचा टप्पा पार पडला आहे. प्रकल्पाला आवश्यक तांत्रिक मान्यता प्राप्त झाली असून दर विश्लेषणाची प्रक्रियाही पूर्ण करण्यात आली आहे. त्यामुळे येत्या काही दिवसांत प्रत्यक्ष निविदा प्रक्रिया सुरू होण्याची शक्यता व्यक्त केली जात आहे.
१२५ मीटरचा काचेचा पूल
पुणे जिल्ह्यातील तीर्थक्षेत्र व पर्यटनस्थळ परिसर विकास योजनेअंतर्गत हाती घेण्यात आलेल्या या प्रकल्पामध्ये सुमारे १२५ मीटर लांबीच्या काचेच्या पुलाचा समावेश आहे. यामध्ये सुमारे २३ मीटर लांबीचा ‘कॅंटिलीव्हर’ भाग प्रस्तावित आहे. या काचेच्या स्कायवॉकवरून पर्यटकांना लोणावळा परिसरातील निसर्गरम्य दऱ्या, डोंगररांगा आणि हिरवाईचे विहंगम दृश्य अनुभवता येणार आहे.
प्रकल्प परिसरात पर्यटकांसाठी आकर्षक प्रवेशद्वार, व्ह्यूइंग गॅलरी, रेस्टॉरंट, पार्किंग व्यवस्था, स्वतंत्र वीज उपकेंद्र, स्वच्छतागृह तसेच परिसराचे सुशोभीकरण यांसारख्या विविध सुविधा उपलब्ध करून देण्यात येणार आहेत. त्यामुळे हा प्रकल्प केवळ काचेच्या पुलापुरता मर्यादित न राहता एक संपूर्ण पर्यटन अनुभव देणारे ठिकाण म्हणून विकसित करण्याचा प्रयत्न आहे.
पर्यटन व्यवसायाला मिळणार चालना
लोणावळा हे पुणे आणि मुंबई या दोन्ही महानगरांच्या जवळ असल्याने वर्षभर पर्यटकांची मोठी वर्दळ असते. पावसाळ्यातील धबधबे, हिरवाईने नटलेल्या डोंगररांगा, घाटमाथा आणि निसर्गरम्य परिसरामुळे लोणावळा हे राज्यातील प्रमुख पर्यटन केंद्रांपैकी एक आहे.
ग्लास स्कायवॉकची उभारणी झाल्यानंतर लोणावळ्याच्या पर्यटन आकर्षणात आणखी भर पडण्याची अपेक्षा आहे. देश-विदेशातील पर्यटकांसाठी हे एक नवे आकर्षण ठरण्याबरोबरच पर्यटकांची संख्या वाढण्यास मदत होऊ शकते. त्याचा थेट फायदा स्थानिक हॉटेल व्यावसायिक, रेस्टॉरंट, खाद्यपदार्थ विक्रेते, वाहतूक व्यावसायिक, पर्यटन मार्गदर्शक, लघुउद्योजक तसेच विविध पर्यटन सेवा देणाऱ्या व्यावसायिकांना होण्याची शक्यता आहे.
स्थानिक रोजगाराच्या संधी वाढणार
पर्यटन प्रकल्पाच्या माध्यमातून स्थानिक पातळीवर रोजगारनिर्मितीलाही चालना मिळण्याची अपेक्षा आहे. प्रकल्पाच्या बांधकामाच्या टप्प्यापासून ते प्रकल्प कार्यान्वित झाल्यानंतरच्या व्यवस्थापनापर्यंत विविध प्रकारच्या रोजगाराच्या संधी निर्माण होऊ शकतात. त्यामुळे स्थानिक अर्थव्यवस्थेला बळकटी मिळण्यास मदत होणार आहे.
मावळ तालुक्यात लोणावळा, खंडाळा, पवना धरण परिसर, किल्ले आणि विविध निसर्गरम्य ठिकाणांमुळे पर्यटनाची मोठी क्षमता आहे. या क्षमतेचा नियोजनबद्ध विकास करण्यासाठी ग्लास स्कायवॉकसारखे आधुनिक पर्यटन प्रकल्प महत्त्वाचे ठरणार आहेत.
मावळच्या पर्यटन विकासाचा महत्त्वाचा टप्पा
मावळची निसर्गसंपदा आणि लोणावळा-खंडाळ्याची पर्यटन ओळख लक्षात घेता प्रस्तावित ग्लास स्कायवॉक हा भविष्यातील पर्यटन विकासातील महत्त्वाचा प्रकल्प मानला जात आहे. निविदा मसुदा अंतिम होऊन प्रत्यक्ष निविदा प्रक्रियेला सुरुवात होण्याचा मार्ग मोकळा झाल्याने प्रकल्पाच्या कामाला गती मिळण्याची अपेक्षा आहे.
आमदार सुनील शेळके यांच्या सातत्यपूर्ण पाठपुराव्यामुळे आणि स्वर्गीय अजितदादा पवार यांच्या माध्यमातून पुढे आलेल्या या प्रकल्पाने आता प्रत्यक्ष अंमलबजावणीच्या दिशेने पाऊल टाकले आहे. त्यामुळे लोणावळ्यासह संपूर्ण मावळ तालुक्याच्या पर्यटन विकासाला नवी दिशा मिळण्याची आशा व्यक्त केली जात आहे.
बातमीसाठी संपर्क 99 22 84 29 92/99 21 80 70 11
