प्रतिशिर्डी साई संस्थांचे संस्थापक, शिवसेनेचे माजी आमदार प्रकाश देवळे यांचे निधन
शिरगाव – शिवसेनेचे निष्ठावान, बहुआयामी व्यक्तिमत्त्व असलेले आणि प्रतिशिर्डी साई संस्थेचे संस्थापक, माजी आमदार प्रकाश केशवराव देवळे (वय ७७) यांचे मंगळवार, दि. २३ सप्टेंबर रोजी रात्री ११.३० वाजता अल्पशा आजाराने निधन झाले. त्यांच्या निधनाने राजकारण, सामाजिक कार्य, शिक्षण व कला क्षेत्राने एक आधारवड गमावला आहे.
त्यांच्यावर २४ सप्टेंबर रोजी दुपारी ३.०० वाजता पुण्यातील वैकुंठ स्मशानभूमी येथे अंत्यसंस्कार होणार आहेत.
प्रकाश देवळे यांचे मूळ गाव पुणे असून त्यांनी आपले शिक्षण १२वी पर्यंत पूर्ण केले. साधे, सरळ पण ठाम व्यक्तिमत्त्व असलेल्या देवळे यांनी आपल्या कामाने लोकांच्या मनात वेगळे स्थान निर्माण केले.
२००१ साली शिरगाव येथे त्यांनी प्रतिशिर्डी साई मंदिर उभे करून भक्तांसाठी श्रद्धेचे केंद्र निर्माण केले. तसेच त्यांनी स्थापन केलेल्या कलायात्री शिक्षण संस्थेच्या माध्यमातून हजारो भटक्या-विमुक्त विद्यार्थ्यांना शिक्षणाच्या प्रवाहात आणले. हे त्यांच्या सामाजिक भानाचे उत्तम उदाहरण मानले जाते. अलीकडेच त्यांना नामदेव शिंपी समाजाचा ‘समाज भूषण पुरस्कार’ प्राप्त झाला होता.
१९९६ मध्ये विधान परिषदेवर निवडून येत त्यांनी तत्कालीन मुख्यमंत्री विलासराव देशमुख यांचा पराभव करून राजकीय वर्तुळात मोठी खळबळ उडवली. ते शिवसेनेचे पुणे जिल्हाप्रमुख राहिले असून, शिवसेना प्रमुख बाळासाहेब ठाकरे यांचे ते निकटवर्ती व विश्वासू सहकारी होते.
देवळे हे फक्त राजकारणीच नव्हे, तर बांधकाम व्यावसायिक, ऑर्केस्ट्राकार, चित्रपट निर्माते, दिग्दर्शक आणि संगीतकार म्हणूनही प्रसिद्ध होते. मराठी चित्रपट ‘मायेची सावली’ निर्मिती, दिग्दर्शन व संगीतकार म्हणून त्यांनी आपला ठसा उमटवला.
त्यांच्या निधनाने पत्नी, दोन मुली, जावई व नातवंडे यांच्यासह संपूर्ण समाज एका आधारवडाला मुकला आहे. त्यांच्या साधेपणामुळे, लोकसंग्रहामुळे आणि सतत लोकांसाठी उपलब्ध राहणाऱ्या स्वभावामुळे त्यांना सर्व स्तरातील लोकांनी अपार प्रेम दिले.
प्रकाश देवळे यांच्या निधनाने राजकारण, समाजसेवा आणि सांस्कृतिक क्षेत्रात निर्माण झालेली पोकळी दीर्घकाळ भरून निघणार नाही, असे सर्वत्र व्यक्त केले जात आहे.
