वडगाव मधील सर्व उद्याने सुसज्ज ठेवावीत – भाजपा पक्षप्रतोद नगरसेवक अनंता कुडे यांची मागणी
वडगाव मावळ (प्रतिनिधी): उन्हाळ्याच्या सुट्टीमुळे शाळांना विश्रांती मिळाल्यानंतर परिसरातील लहान मुले व विद्यार्थी खेळण्यासाठी उद्यानांकडे मोठ्या प्रमाणावर वळत आहेत. या पार्श्वभूमीवर वडगाव नगरपंचायत हद्दीतील सर्व उद्याने सुरक्षित, स्वच्छ आणि सुसज्ज ठेवावीत, अशी मागणी भाजपा पक्षप्रतोद नगरसेवक अनंता कुडे यांनी प्रशासनाकडे केली आहे.
सध्या अनेक उद्यानांमध्ये खेळण्यांची साधने जीर्ण अवस्थेत असून काही ठिकाणी ती तुटलेली किंवा बिघडलेली असल्याचे दिसून येते. अशा परिस्थितीत उद्यानात खेळण्यासाठी येणाऱ्या बालकांच्या सुरक्षिततेचा प्रश्न निर्माण होत आहे. त्यामुळे तातडीने दुरुस्ती करून सर्व खेळणी व्यवस्थित स्थितीत ठेवावीत, जेणेकरून कोणत्याही प्रकारची दुखापत होणार नाही, असे कुडे यांनी नमूद केले.
यासोबतच उद्यानांची नियमित स्वच्छता राखणे, परिसरातील झाडांना वेळेवर पाणी देणे आणि हरित वातावरण टिकवून ठेवणेही तितकेच महत्त्वाचे असल्याचे त्यांनी सांगितले. वाढत्या उन्हाच्या पार्श्वभूमीवर झाडांचे संगोपन केल्यास नागरिकांना थंडावा मिळण्यास मदत होणार आहे.
दरम्यान, या सर्व कामांसाठी नगरपंचायतीने स्वतंत्र पथक नेमून नियमित देखरेख करावी, अशी मागणीही करण्यात आली आहे. उद्यानांची योग्य देखभाल झाल्यास लहान मुलांसाठी सुरक्षित आणि आनंददायी वातावरण निर्माण होईल, असा विश्वास स्थानिक नागरिकांनी व्यक्त केला आहे.
