अकोला जिल्ह्यातील अपूर्ण कामांवर आमदार सुनील शेळके यांचा थेट आढावा; दोषींवर कारवाईचे आदेश
मुंबई : विधानभवनात आज झालेल्या रोजगार हमी योजना समितीच्या महत्त्वपूर्ण बैठकीत आमदार सुनील शेळके यांच्या अध्यक्षतेखाली अकोला जिल्ह्यातील अपूर्ण प्रलंबित कामांवर सखोल चर्चा झाली. समितीच्या अकोला जिल्ह्याच्या (११ ते १३ ऑक्टोबर २०२१) झालेल्या दौऱ्यात दिलेल्या आश्वासनांवरील कार्यवाहीचा आढावा घेण्यासाठी ही बैठक आयोजित करण्यात आली होती.
सन २००७ मध्ये मंजूर झालेल्या सिंचन विहिरींच्या अनेक कामा अद्याप अपूर्ण असल्याचे बैठकीत स्पष्ट झाले. शेतकऱ्यांच्या शेतीसाठी महत्त्वाच्या या प्रकल्पांमध्ये झालेली ही ढिलाई थेट शेतकऱ्यांच्या हिताला बाधक ठरत असल्याची बाब आमदार शेळके यांनी अधोरेखित केली.
सामाजिक वनीकरण विभागात २०१९ पासून रोपवाटीका उभारण्यात आलेली नाही, असे गंभीर वास्तव बैठकीत समोर आले. पर्यावरण संवर्धन व रोजगार निर्मितीच्या दृष्टीने या कामांचे महत्त्व अधोरेखित करत शेळके यांनी तातडीने सुधारणा करण्याचे आदेश दिले.
रेशीम विभागात २०१८ ते २०२२ दरम्यान मंजूर झालेली अनेक कामे तीन वर्षांनंतरही अपूर्ण आहेत. ग्रामीण अर्थव्यवस्थेला चालना देणाऱ्या या योजनांकडे झालेल्या दुर्लक्षाबद्दल आमदार शेळके यांनी तीव्र नाराजी व्यक्त केली.
प्रधानमंत्री आवास योजनेअंतर्गत २५६ घरकुलांची कामे पूर्ण असूनही लाभार्थ्यांचे हप्ते वितरित झालेले नाहीत, हे धक्कादायक वास्तव बैठकीत उघड झाले. घरकुलधारकांना तातडीने थकित रकमेचे हप्ते मिळावेत, यासाठी अधिकाऱ्यांना निर्देश देण्यात आले.
२०१६ ते २०२२ दरम्यान मंजूर झालेली अनेक रस्ते व शेतरस्त्यांची कामे अजूनही प्रलंबित असल्याचे निदर्शनास आले. विशेषत: शेतरस्त्यांमध्ये झालेल्या अनियमिततेवर चौकशी पूर्ण झाली असली तरी पुढील कारवाई अद्याप झाली नसल्याचे उघड झाले.
बैठकीदरम्यान आमदार सुनील शेळके यांनी अधिकाऱ्यांना ठोस शब्दांत संदेश दिला की –
> “शेतकरी आणि कष्टकरी वर्गाच्या हिताशी संबंधित कोणतेही काम प्रलंबित ठेवले जाणार नाही. शेतकरी राजा हा कोणत्याही योजनेतून वंचित राहणार नाही. योजनांचे लाभ शेतकऱ्यांना वेळेवर मिळाले पाहिजेत, हेच सरकारचे प्राधान्य असले पाहिजे.”
तसेच, दोषींवर विभागीय चौकशी करून आवश्यक असल्यास फौजदारी कारवाई करण्याच्या स्पष्ट सूचना त्यांनी सचिवांना दिल्या.
या बैठकीस आमदार सुरेश खाडे, अमोल जावळे, राजेश वानखेडे, काशिनाथ दाते, संजय देरकर, नितीन देशमुख, शिरीषकुमार नाईक, बापुसाहेब पठारे, किशोर दराडे, तसेच प्रधान सचिव, कृषि प्रधान सचिव, ग्रामविकास सचिव, नियोजन विभागाचे वरिष्ठ अधिकारी, अकोला जिल्हा परिषदेचे उपजिल्हाधिकारी, जिल्हा वनसंरक्षक अधिकारी आदी मान्यवर उपस्थित होते.
