घराला भीषण आग — मोठ्या प्रमाणात नुकसान; दोन भरलेले सिलेंडर सुरक्षित बाहेर काढले
वडगाव मावळ : कान्हे फाटा परिसरात एका घराला लागलेल्या भीषण आगीत घरातील मोठ्या प्रमाणात संसारोपयोगी वस्तू जळून खाक झाल्याची घटना घडली. या घटनेमुळे परिसरात काही काळ भीतीचे वातावरण निर्माण झाले होते.
मिळालेल्या माहितीनुसार, कान्हे फाटा येथील ग्रामसेवक यांनी दिलेल्या वर्दीनंतर वडगाव नगरपंचायत अग्निशमन दल, तळेगाव दाभाडे नगरपरिषद अग्निशमन दल तसेच वडगाव पोलीस ठाणे प्रशासन तात्काळ घटनास्थळी दाखल झाले. संयुक्तपणे शर्थीचे प्रयत्न करून आग आटोक्यात आणण्यात आली.
या आगीत घरातील फर्निचर, कपडे, इलेक्ट्रिक साहित्य व इतर वस्तू पूर्णपणे जळून खाक झाल्याने मोठे आर्थिक नुकसान झाले आहे. मात्र, घरात ठेवलेले दोन भरलेले गॅस सिलेंडर वेळेत सुरक्षित बाहेर काढण्यात आल्याने मोठा अनर्थ टळला.
या बचाव कार्यात वडगाव अग्निशमन दलाचे जवान ताहीर मोमिन, प्रदीप तुमकर, विनोद ढोरे आणि समीर दंडेल यांनी धाडसाने काम केले. तसेच तळेगाव दाभाडे अग्निशमन दलाचे धीरज शिंदे, अनुपम सिंग, शेखर खोमणे, आकाश ओव्हाळ, अक्षय घोडेकर आणि भास्कर माळी यांनीही तत्परतेने सहभाग घेत आग नियंत्रणात आणण्यास मोलाची मदत केली.
घटनेचे कारण अद्याप स्पष्ट झाले नसून अधिक तपास सुरू आहे. दरम्यान, स्थानिक नागरिकांनी अग्निशमन दल व पोलिस प्रशासनाच्या जलद आणि धाडसी कामगिरीचे कौतुक केले आहे.
