छत्रपती शिवाजी महाराज चौकात एकतर्फी वाहतुकीचे नियमन : कामशेत पोलिसांकडून नागरिकांना आवाहन
कामशेत (ता. मावळ) : कामशेत पोलीस स्टेशन अंतर्गत छत्रपती शिवाजी महाराज चौक परिसरात वाहतुकीची वाढती कोंडी आणि अपघातांचे प्रमाण लक्षात घेऊन पोलिस प्रशासनाकडून आता या चौकात एकतर्फी वाहतुकीचा निर्णय घेण्यात आला आहे. स्थानिक नागरिक, व्यापारी, तसेच प्रवाशांच्या सुरक्षिततेसाठी हा निर्णय घेण्यात आला असून, नागरिकांनी वाहतुकीचे नियम पाळून पोलिसांना सहकार्य करण्याचे आवाहन करण्यात आले आहे.
कामशेत हे पुणे-मुंबई राष्ट्रीय महामार्गालगत वसलेले असून, पर्यटनदृष्ट्या आणि व्यापारी दृष्ट्या हे ठिकाण दिवसेंदिवस विकसित होत आहे. त्यामुळे या भागातील वाहतूक दिवसेंदिवस वाढत चालली आहे. विशेषतः छत्रपती शिवाजी महाराज चौक हा कामशेत शहराचा मध्यवर्ती भाग असल्याने येथे सतत वाहनांची गर्दी राहते. सकाळी आणि सायंकाळी कार्यालयीन तसेच शाळा-काॅलेज वेळेत या चौकात वाहतूक कोंडी निर्माण होते. त्यामुळे नागरिकांना अडचणींना सामोरे जावे लागते.
या पार्श्वभूमीवर कामशेत पोलिसांनी वाहतुकीची शिस्त प्रस्थापित करण्यासाठी आणि अपघाताचे प्रमाण कमी करण्यासाठी छत्रपती शिवाजी महाराज चौकात एकतर्फी वाहतुकीची अंमलबजावणी सुरू केली आहे. या चौकातून वाहनांची ये-जा एकाच दिशेने होईल, अशी नवीन व्यवस्था करण्यात आली आहे. विरुद्ध दिशेने वाहन चालवणाऱ्या चालकांवर कायदेशीर कारवाई करण्याचे निर्देशही पोलिसांकडून देण्यात आले आहेत.
कामशेत पोलिस ठाण्याचे पोलिस निरीक्षक यांच्या मार्गदर्शनाखाली वाहतूक शाखेतील कर्मचारी या ठिकाणी गस्त घालत असून, चौकात वाहतुकीसाठी आवश्यक चिन्हे आणि फलक बसविण्यात आले आहेत. वाहनचालकांनी नियमांचे पालन न केल्यास दंड आकारला जाणार आहे, असेही पोलिसांनी स्पष्ट केले आहे.
स्थानिक नागरिक व व्यापाऱ्यांनी पोलिसांच्या या उपक्रमाचे स्वागत केले असून, “वाहतुकीची शिस्त राखली तर अपघात टळतील आणि सर्वांचा वेळ वाचेल,” असे मत व्यापारी संघटनेच्या प्रतिनिधींनी व्यक्त केले. काही वाहनचालकांनी मात्र अचानक अंमलबजावणी झाल्याने थोडासा गोंधळ निर्माण झाल्याचे सांगितले आहे. त्यावर पोलिसांनी नागरिकांना काही दिवस सहकार्य करण्याचे आवाहन केले आहे.
कामशेत पोलिसांच्या माहितीनुसार, काही वाहनचालक चौकातून विरुद्ध दिशेने जात असल्याचे आढळले असून, अशा चालकांवर कायद्याअंतर्गत कारवाई सुरू करण्यात आली आहे. “वाहतुकीचे नियम सर्वांच्या सुरक्षिततेसाठी आहेत. थोडीशी शिस्त राखली तर जीव वाचतो. त्यामुळे नागरिकांनी नियमांचे पालन करावे आणि उलट दिशेने वाहन चालवू नये,” असे आवाहन पोलिस निरीक्षकांनी केले आहे.
कामशेतच्या वाहतुकीत गेल्या काही महिन्यांत मोठ्या प्रमाणावर वाढ झाली आहे. शनिवार-रविवार सुट्टीच्या दिवशी लोणावळा, तुंग, तिकोना किल्ला, पवना धरण या पर्यटनस्थळांकडे जाणाऱ्या वाहनांची संख्याही वाढते. त्याचा ताण छत्रपती शिवाजी महाराज चौक परिसरावर येतो. त्यामुळे वाहतुकीचे नियमन करणे अत्यावश्यक झाले होते. पोलिस प्रशासनाने घेतलेली ही तातडीची पावले आता स्थानिक शिस्तबद्ध वाहतुकीकडे एक सकारात्मक पाऊल ठरणार आहेत.
कामशेत पोलिसांनी पुन्हा एकदा नागरिकांना आवाहन केले आहे की, “वाहतुकीचे नियम पाळा, स्वतःचे आणि इतरांचे प्राण सुरक्षित ठेवा. विरुद्ध दिशेने वाहन चालविल्यास दंड आणि कायदेशीर कारवाई टाळण्यासाठी नियमांचे पालन करा.
प्रतिनिधी.मो९९२१८०७०११
