जागतिक पोस्ट ऑफिस दिनानिमित्त तळेगाव स्टेशन पोस्ट ऑफिसमध्ये मोफत आरोग्य तपासणी शिबिर
तळेगाव दाभाडे : जागतिक पोस्ट ऑफिस दिनानिमित्त तळेगाव स्टेशन येथील यशवंत नगर पोस्ट ऑफिसमध्ये सुखद होमिओपॅथिक क्लिनिकतर्फे पोस्ट विभागातील कर्मचाऱ्यांसाठी मोफत आरोग्य तपासणी शिबिराचे आयोजन करण्यात आले. सतत लोकसेवा करणाऱ्या टपाल कर्मचाऱ्यांच्या आरोग्याचे महत्त्व ओळखून हा उपक्रम राबविण्यात आला.
या शिबिरात रक्तदाब, मधुमेह तपासणी, वजन–उंची प्रमाण तपासणी, जीवनशैलीविषयक सल्ला तसेच होमिओपॅथिक आरोग्य मार्गदर्शन करण्यात आले. कर्मचाऱ्यांच्या दैनंदिन कामाच्या स्वरूपामुळे होणारा मानसिक ताण, झोपेची कमतरता व चुकीच्या आहाराच्या सवयींबाबतही मार्गदर्शन करण्यात आले.
सुखद होमिओपॅथिक क्लिनिकच्या संस्थापक डॉ. सायली देबडवार फुटाणे यांनी कर्मचाऱ्यांशी संवाद साधत नियमित आरोग्य तपासणीचे महत्त्व स्पष्ट केले. त्यांनी सांगितले की, “आरोग्याची काळजी घेणे ही प्रत्येकाची स्वतःशी असलेली जबाबदारी आहे. नैसर्गिक, संतुलित आहार व नियमित व्यायामाने अनेक आजार टाळता येतात.”
यशवंत नगर पोस्ट ऑफिस अंतर्गत येणाऱ्या आंबळे, आंबी, इंदुरी, नवलाख उंबरे, वराळे, विष्णुपुरी या उप टपाल कार्यालयांतील कर्मचाऱ्यांनी या आरोग्य तपासणीचा लाभ घेतला. बहुसंख्य कर्मचाऱ्यांनी या उपक्रमाबद्दल समाधान व्यक्त केले.
या शिबिराच्या आयोजनात सुखद होमिओपॅथिक क्लिनिक टीम सक्रियपणे सहभागी झाली होती. क्लिनिकच्या टीमने पुढेही अशा समाजोपयोगी आरोग्य उपक्रमांचे आयोजन करत राहण्याची ग्वाही दिली.
कार्यक्रमाच्या शेवटी यशवंत नगर पोस्ट ऑफिसच्या मुख्य पोस्टमास्टर श्रीमती प्रेरणा मेश्राम यांनी डॉ. सायली व त्यांच्या टीमचे मनःपूर्वक आभार मानत सांगितले की, “कर्मचाऱ्यांचे आरोग्य चांगले राहणे हे आमच्यासाठी सर्वात महत्त्वाचे आहे. अशा आरोग्य उपक्रमांमुळे सकारात्मक वातावरण निर्माण होते.”
या शिबिरामुळे टपाल विभागातील कर्मचाऱ्यांमध्ये आरोग्यजागृतीचा संदेश पसरला असून, नागरिकांनीही या उपक्रमाचे कौतुक केले आहे.
प्रतिनिधी – गणेश नामदेव भेगडे (मो 9921807011)
