देहूरोड छावणी परिषदेत नागरिकांच्या तक्रारींवर आढावा बैठक
आमदार सुनील शेळके यांच्या प्रमुख उपस्थितीत प्रशासनाला ठोस निर्देश
देहूरोड : देहूरोड छावणी परिषद क्षेत्रातील रस्ते, गटार, कचरा व्यवस्थापन तसेच विद्युत विषयक कामांबाबत सातत्याने वाढत असलेल्या नागरिकांच्या तक्रारींच्या पार्श्वभूमीवर गुरुवार, दि. २८ ऑगस्ट २०२५ रोजी आढावा बैठक घेण्यात आली. या बैठकीस मावळ विधानसभा मतदारसंघाचे आमदार सुनील शेळके यांची प्रमुख उपस्थिती होती.
बैठकीस छावणी परिषदेच्या मुख्य कार्यकारी अधिकारी सौ. गीतांजली रावत अध्यक्षस्थानी होत्या. नागरिकांच्या अडचणी गांभीर्याने ऐकून घेत आमदार शेळके यांनी प्रशासनाला ठोस आणि तातडीने उपाययोजना करण्याचे निर्देश दिले.
आमदार शेळके म्हणाले की, “नागरिकांना भौतिक सोयी-सुविधा तातडीने मिळाल्या पाहिजेत. संबंधित विभागीय अधिकाऱ्यांनी वेळमर्यादा निश्चित करून काम पूर्ण करणे अनिवार्य आहे. लोकांच्या समस्यांकडे दुर्लक्ष सहन केले जाणार नाही.”
यावेळी मुख्य कार्यकारी अधिकारी रावत यांनी माहिती दिली की, देहूरोड शहरात लवकरच “शासन आपल्या दारी” हा उपक्रम राबविण्यात येणार आहे. या उपक्रमांतर्गत नागरिकांना शासकीय दाखले, आधारकार्ड, रेशनकार्ड, मतदानकार्ड तसेच विविध शासकीय योजनांचा लाभ एका ठिकाणी सहजपणे मिळणार आहे.
बैठकीस विद्युत विभाग, महाराष्ट्र राज्य रस्ते वाहतूक, सार्वजनिक बांधकाम, महसूल, वन विभाग आदी विभागांचे अधिकारी मोठ्या संख्येने उपस्थित होते.
स्थानिक लोकप्रतिनिधी अशोक आप्पा शेलार, प्रवीण झेंडे, रघुवीर शेलार, उमेश नायडू, बाळासाहेब जाधव, तानाजी काळभोर, कृष्णा दाभोळे, किशोर गाथाडे, आशिष बन्सल, नंदू काळोखे, संगिता (नानी) वाघमारे यांच्यासह नागरिकांची उपस्थिती लक्षणीय होती.
या बैठकीत नागरिकांच्या तक्रारींवर तातडीने कारवाई करून शहरातील पायाभूत सुविधा सुधारण्याचा ठोस निर्धार व्यक्त करण्यात आला
