नवलाख उंब्रे व परिसरातील ग्रामस्थांचा इशारा रंगला : तळेगाव एमआयडीसी रस्त्याच्या कामाला गती
नवलाख उंब्रे : नवलाख उंब्रे व परिसरातील ग्रामस्थांनी दिलेल्या “११ ऑगस्टपासून तळेगाव एमआयडीसी बंद व बेमुदत उपोषण” या इशाऱ्याला प्रशासनाने गांभीर्याने घेतले असून, तळेगाव एमआयडीसी फेज १ व फेज २ यांना जोडणाऱ्या मुख्य रस्त्याचे काम अखेर मार्गी लागले आहे. महाराष्ट्र विकास महामंडळाकडून या कामासाठी तब्बल ₹४० कोटी ९० लाख ७६ हजार ७२ रुपये निधी मंजूर झाला आहे. यासोबतच ई-निविदा प्रक्रिया सुरू झाली असून येत्या महिनाभरात टेंडर अंतिम होण्याची शक्यता आहे.
निधी व खर्चाचे तपशील
मुख्य रस्ता बांधणीसाठी अपेक्षित खर्च : ₹३१,२०,३५,८८८
फेज १ मधील मंगरूळ रस्ता व जॅकवेल रस्त्याचे रुंदीकरण : ₹९,७०,४०,८३८
निविदा प्रक्रिया कालावधी : ४ सप्टेंबर ते १ ऑक्टोबर २०२५
ग्रामस्थांचा दबाव निर्णायक ठरला
गेल्या काही वर्षांपासून तळेगाव एमआयडीसी परिसरातील उद्योजक, कामगार व ग्रामस्थ या रस्त्याच्या कामासाठी सातत्याने मागणी करत होते. मात्र मागणी वारंवार मागे पडत असल्याने ग्रामस्थांनी यावर्षी आंदोलनाचा इशारा दिला. नवलाख उंब्रे व परिसरातील नागरिकांच्या एकतेमुळे प्रशासनावर दबाव निर्माण झाला आणि अखेर शासनाने तातडीने निधी मंजूर करून निविदा प्रक्रियेला गती दिली.
लोकप्रतिनिधी व उद्योजकांचा पाठपुरावा
या रस्त्याच्या कामासाठी आमदार सुनील शेळके यांनी वारंवार शासनदरबारी पाठपुरावा केला. माजी राज्यमंत्री संजय बाळा भेगडे यांनीही विविध स्तरावर प्रयत्न केले. तर ज्येष्ठ उद्योजक रामदास काकडे यांनी स्थानिक उद्योग व कामगारांच्या समस्या अधोरेखित करत प्रशासनाचे लक्ष वेधले.
अपेक्षित बदल
रस्त्याचे काम पूर्ण झाल्यानंतर फेज १ व फेज २ मधील औद्योगिक वाहतूक सुरळीत होणार.
गाव व परिसरातील अपघातांचे प्रमाण कमी होण्यास मदत मिळेल.
कामगार व ग्रामस्थांचा प्रवासाचा वेळ आणि खर्च वाचेल.
या भागातील नवीन उद्योग गुंतवणुकीस चालना मिळेल.
समाधानाचे वातावरण
दीर्घकाळ प्रलंबित असलेला प्रश्न सुटल्याने तळेगाव एमआयडीसी परिसरात उद्योजक, कामगार व ग्रामस्थांमध्ये समाधान व आनंदाचे वातावरण आहे. ग्रामस्थांच्या संघर्षाला अखेर यश आले असून, आता या कामाची प्रत्यक्ष अंमलबजावणी वेळेत व्हावी, अशी सर्वांची अपेक्षा आहे
प्रतिनिधी – गणेश नामदेव भेगडे (मो. ९९२१८०७०११)
