बकरी ईद पार्श्वभूमीवर वडगाव शहरात पोलिसांचा भव्य रूट मार्च
संवेदनशील भागांमध्ये पोलिसांची उपस्थिती; नागरिकांना शांतता व कायदा सुव्यवस्था राखण्याचे आवाहन
वडगाव मावळ दि. २७ : आगामी बकरी ईद सणाच्या पार्श्वभूमीवर कायदा व सुव्यवस्था अबाधित राखण्यासाठी वडगाव मावळ पोलीस स्टेशनच्या वतीने बुधवारी सायंकाळी वडगाव शहरात भव्य रूट मार्च काढण्यात आला. पोलीस निरीक्षक शंकर पाटील यांच्या मार्गदर्शनाखाली हा रूट मार्च पार पडला असून शहरातील प्रमुख व संवेदनशील भागांमध्ये पोलिसांनी पायी संचलन करत नागरिकांमध्ये सुरक्षिततेची भावना निर्माण केली.
सदर रूट मार्च आज दिनांक २७ मे २०२६ रोजी सायंकाळी ६.०० ते ७.३० वाजण्याच्या दरम्यान घेण्यात आला. पंचायत समिती चौक, श्री पोटोबा महाराज मंदिर परिसर, जमा मशीद, ढोरेवाडा, मोरया चौक, छत्रपती शिवाजी महाराज चौक, मिलिंद नगर चौक, कुडे वाडा, चावडी चौक, माळीनगर, केशवनगर तसेच विशाल लॉन्स परिसर अशा विविध भागांतून पोलिसांनी संचलन केले.
या रूट मार्चमध्ये १ पोलीस निरीक्षक, १ सहाय्यक पोलीस निरीक्षक, २ ग्रेड पोलीस उपनिरीक्षक, १५ पोलीस अंमलदार तसेच १० होमगार्ड जवान सहभागी झाले होते. पोलिसांच्या या संचलनामुळे शहरातील नागरिकांमध्ये विश्वासाचे वातावरण निर्माण झाले असून सण शांततेत व उत्साहात साजरा करण्याचे आवाहन यावेळी पोलिसांकडून करण्यात आले.
पोलीस प्रशासनाकडून सणाच्या काळात कोणतीही अफवा पसरवू नये, सोशल मीडियावर आक्षेपार्ह संदेश टाकू नयेत तसेच संशयास्पद हालचाली आढळल्यास तात्काळ पोलिसांना माहिती द्यावी, असे आवाहन करण्यात आले आहे. वडगाव मावळ पोलीस स्टेशनच्या या दक्षतेमुळे शहरात सुरक्षिततेचे वातावरण निर्माण झाले असून नागरिकांनीही पोलिसांच्या या उपक्रमाचे स्वागत केले.
