मतदान जनजागृतीसाठी तळेगाव दाभाडे नगरपरिषदेचा उपक्रम; शाळेत उत्साहात विविध स्पर्धा
तळेगाव दाभाडे : स्थानिक स्वराज्य संस्थांच्या सार्वत्रिक निवडणुकांच्या पार्श्वभूमीवर तळेगाव नगरपरिषदेकडून कार्यक्षेत्रात मतदार जनजागृतीसाठी व्यापक अभियान राबविण्यात आले आहे. लोकशाही बळकट करण्यासाठी सर्व स्तरांतून नागरिकांनी सहभाग नोंदवावा, या उद्देशाने वक्तृत्व, निबंध, चित्रकला, वादविवाद यांसारख्या स्पर्धांसह मतदार जनजागृती रॅली आणि शपथ विधी अशा उपक्रमांचे आयोजन करण्यात आले.
नगरपरिषदेचे मुख्याधिकारी गिरीश दाबकेकर तसेच शिक्षण विभाग प्रशासन अधिकारी श्रीमती अनिता वैद्य यांच्या मार्गदर्शनाखाली हा उपक्रम राबविण्यात आला. वीर जिजामाता प्राथमिक कन्या शाळा क्रमांक ५ येथे हा कार्यक्रम उत्साहात पार पडला. शाळेच्या मुख्याध्यापिका सौ. विजया अविनाश दांगट यांनी दिलेल्या माहितीनुसार सर्व विद्यार्थिनी, शिक्षकवर्ग आणि पालकांनी उत्स्फूर्त सहभाग नोंदवला.
कार्यक्रमात विद्यार्थिनींनी मतदानाचे महत्व सांगणारी घोषवाक्ये दिली, पोस्टर्स सादर केली तसेच लोकशाही प्रक्रियेबद्दल जागरूकता निर्माण केली. समाजातील प्रत्येक मतदाराने मतदान करणे ही कर्तव्य आणि जबाबदारी असल्याचा संदेश या उपक्रमातून देण्यात आला.
या उपक्रमामुळे परिसरात मतदार जागृतीचे वातावरण निर्माण झाले असून, आगामी निवडणुकांत मतदानाचा टक्का वाढण्यास मदत होईल, असा विश्वास आयोजकांनी व्यक्त केला.
प्रतिनिधी=गणेश नामदेव भेगडे.मो९९२१८०७०११
