माजी राज्यमंत्री संजय बाळा भेगडे यांनी घेतली उपोषणकर्त्यांची भेट
देहुगाव : श्री क्षेत्र देहूगाव ते देहू फाटा-येलवाडी मार्गाची गेल्या अनेक वर्षांपासून दुरवस्था झाल्याने नागरिक, वाहनचालक, शेतकरी, कामगार तसेच भाविक त्रस्त झाले आहेत. रस्त्यावर सर्वत्र खड्डे पडल्याने अपघातांची मालिका सुरू आहे. उन्हाळ्यात प्रचंड धुळीचा आणि पावसाळ्यात चिखलाचा त्रास होत असल्याने हा मार्ग वापरणे जिकिरीचे झाले आहे.
या गंभीर प्रश्नाकडे प्रशासनाचे लक्ष वेधण्यासाठी माजी सरपंच नितीन गाडे (पाटील) यांनी आमरण उपोषण सुरू केले आहे. त्यांच्या या आंदोलनाला पाठिंबा देण्यासाठी आणि स्थानिकांची व्यथा जाणून घेण्यासाठी माजी राज्यमंत्री संजय बाळा भेगडे यांनी उपोषणस्थळी भेट दिली.
भेगडे साहेबांनी उपोषणकर्त्यांशी संवाद साधत हा मार्ग तातडीने दुरुस्त व्हावा, अशी मागणी प्रशासनाकडे केली. यावेळी त्यांनी थेट सार्वजनिक बांधकाम मंत्री शिवेंद्रराजे भोसले यांच्याशी दूरध्वनीवरून संपर्क साधला. रस्त्याच्या निकृष्ट अवस्थेबाबत सविस्तर माहिती देऊन त्वरित कारवाईची विनंती केली.
मंत्री शिवेंद्रराजे भोसले यांनी या प्रकरणी आवश्यक ती तातडीची कारवाई होईल, असे आश्वासन दिले. त्यांच्या या आश्वासनानंतर उपोषणकर्त्यांनी समाधान व्यक्त करत आंदोलन मागे घेण्याचा निर्णय घेतला.
दरम्यान, रस्ता दुरुस्तीचे काम लवकरच सुरू होणार असल्याचे संकेत मिळाले असून स्थानिक नागरिक व उपोषणकर्त्यांनी माजी राज्यमंत्री संजय बाळा भेगडे आणि सार्वजनिक बांधकाम मंत्री शिवेंद्रराजे भोसले यांचे आभार मानले आहेत.
(प्रतिनिधी गणेश नामदेव भेगडे) ९९२१८०७०११
