मावळात पुन्हा एकदा अजगराचा विस्मय! शेतात १४ फुटी इंडियन रॉक पायथनची उपस्थिती
पवना नगर: मावळ परिसर पुन्हा एकदा वन्यजीव प्रेमींनी दचकावा अशी घटना पाहिली आहे. महागाव शिवारातील शेतात भात कापणी करत असताना तब्बल १४ फुटांचा इंडियन रॉक पायथन (अजगर) शेतकऱ्यांच्या नजरेस आला.
ही घटना आज १० नोव्हेंबर रोजी सकाळी घडली. शेतकरी कुंडलिक पडवळ हे आपल्या शेतात भात कापणीचे काम करत होते. त्यावेळी अचानक त्यांच्या नजरेस भाताच्या पुंजक्यात हालचाल दिसली. जवळ जाऊन पाहिले असता मोठा अजगर वेटोळं घालून बसलेला दिसला. त्यांनी तत्काळ वन्यजीव रक्षक मावळ संस्था यांच्याशी संपर्क साधला.
माहिती मिळताच संस्थेचे सदस्य रमेश कुंभार आणि अभिनव पडवळ हे घटनास्थळी दाखल झाले. साप पाहताच त्यांनी ओळख पटवली की तो इंडियन रॉक पायथन या संरक्षित प्रजातीतील अजगर आहे. दोघांनी दक्षतेने आणि कौशल्यपूर्ण पद्धतीने अजगराला सुरक्षितपणे पकडले.
यानंतर त्यांनी संस्थेचे संस्थापक निलेश संपतराव गराडे आणि अध्यक्ष अनिल यशवंत आंद्रे यांना माहिती दिली. तसंच वन विभागालाही घटनेची त्वरित माहिती देण्यात आली. अनिल आंद्रे यांनी स्वतः घटनास्थळी येऊन अजगराची प्राथमिक तपासणी केली असता तो पूर्णपणे निरोगी असल्याचे स्पष्ट झाले.
यानंतर वन विभागाच्या मार्गदर्शनाखाली त्या अजगराला पुन्हा सुरक्षितपणे त्याच्या नैसर्गिक अधिवासात सोडण्यात आले.
या घटनेमुळे शेतकऱ्यांमध्ये काही काळ भीतीचे वातावरण निर्माण झाले असले तरी वन्यजीव रक्षकांच्या तत्पर कारवाईमुळे कोणतीही हानी झाली नाही. संस्थेच्या या कार्याचे स्थानिक ग्रामस्थांनी कौतुक केले. गेल्या पंधरा दिवसात वन्यजीव रक्षक मावळ संस्थेकडून ३अजगराना जिवदान देण्यात आले असुन महिन्याभरात ५०विषारी घोणस सापाना सुरक्षितपणे नैसर्गिक अधिवासात सोडण्यात आले आहे.
प्रतिनिधी=गणेश नामदेव भेगडे.मो९९२१८०७०११
