मावळ तालुक्यात सर्रासपणे अमली पदार्थ विक्री विरोधात कामशेत येथे १५ ऑगस्ट रोजी लक्षणिक उपोषण करणार माजी सरपंच अभिमन्यू शिंदे
कामशेत : मावळ तालुक्याला ऐतिहासिक महत्व आहे, छत्रपती शिवाजी महाराज यांचा सहवास या मावळ भूमीला लाभला आहे. तसेच संत तुकाराम महाराज, संत जगनाडे महाराज या संत परंपरेचा तालुक्यात वारसा जपणारे वारकरी आहेत; परंतु अशा माझ्या मावळ भूमीत सध्या अमली पदार्थ सर्रासपणे विक्री होत असल्याने तरुण पिढी व शालेय विद्यार्थी व्यसनाच्या आहारी जात आहे. मावळ तालुक्यात लोणावळा, तळेगाव दाभाडे, वडगाव, देहू, देहूरोड, कामशेत अशा मोठ्या शहरात व ग्रामीण भागात सर्रासपणे गांजा, एमडी पावडर, ड्रग्ज अशा अमली पदार्थाची विक्री होत आहे.
यामुळे काही शालेय विद्यार्थी व्यसनाच्या आहारी गेले आहेत. त्यामुळे त्यांचे आयुष्य धोक्यात आले आहे. तसेच त्यांच्या कुटुंबाची मोठी हानी होत असल्याची माहिती कामशेत चे माजी सरपंच अभिमन्यू प्रकाश शिंदे यांनी एका प्रसिद्धी पत्रकारद्वारे दिली आहे.
मावळ तालुक्यात विविध नामाकिंत विद्यापीठ, कॉलेज स्थापन झालेले आहेत. काही समाज विद्रूप करणारी टोळी विद्यार्थ्यांना नशेच्या आहारी लावत आहे. तालुक्यात शालेय आवारात काही ठिकाणी सर्रासपणे गुटखा, तंबाखू, मावा विक्री केली जात आहे; ह्या अशा गोष्टीना आळा घालून माझ्या तरुण बांधवाना नशेच्या आहारी जाण्यापासून वाचवले पाहिजे, प्रशासनाने दखल घेऊन योग्य ती कारवाई करावी, अशी मागणी माजी सरपंच अभिमन्यू शिंदे यांनी केली आहे.
तालुक्यात अमली पदार्थाची सर्रासपणे विक्री होत असल्याच्या विरोधात शुक्रवार दिनांक १५ऑगस्ट २०२५रोजी, सकाळी १०:३०वा. महादेव मंदीर, बाजारपेठ, रेल्वे स्टेशन जवळ, कामशेत येथे लाक्षणिक उपोषण करणार असल्याची माहिती त्यांनी दिली.
प्रतिनिधी =गणेश नामदेव भेगडे. ९९२१८०७०११
