वडगाव नगरपंचायतीची पर्यावरणपूरक गणेशोत्सवासाठी तयारी
वडगाव, ता. मावळ : गणेशोत्सवाच्या पार्श्वभूमीवर पर्यावरण संवर्धनाला चालना देण्यासाठी व स्वच्छतेचे भान राखण्यासाठी वडगाव नगरपंचायतीकडून कृत्रिम विसर्जन हौद तसेच निर्माल्य कलशाची विशेष व्यवस्था करण्यात आली आहे. “स्वच्छ सर्वेक्षण” व “माझी वसुंधरा अभियान ६.०” या मोहिमेअंतर्गत नगरपंचायतीने शहरातील सर्व गणेश भक्तांना पर्यावरणपूरक पद्धतीने गणेशोत्सव साजरा करण्याचे आवाहन केले आहे.
मूर्ती दान केंद्राची सुविधा
शहरातील सर्व नागरिकांनी घरीच गणेशपूजन व आरती करून गणेश विसर्जन न करता नगरपंचायतीच्या कार्यालयात उभारण्यात आलेल्या श्री गणेश मूर्ती दान केंद्रात मूर्ती दान कराव्यात, असे स्पष्ट करण्यात आले आहे.
कृत्रिम विसर्जन हौदाची ठिकाणे
शहरातील विहिरी, नदी, तलाव याठिकाणी गणेश विसर्जन करण्यास सक्त मनाई करण्यात आली असून, त्याऐवजी पुढील ठिकाणी कृत्रिम विसर्जन हौद उपलब्ध करून देण्यात आले आहेत –
1. केशवनगर, पाणी टाकीजवळ
2. विजयनगर कॉलनी
3. श्री पोटोबा महाराज तलावाजवळ
4. स्मशानभूमी पाठीमागे
5. माळीनगर
6. प्रभाग क्र. १६, पाणी टाकीजवळ
7. प्रभाग क्र. १७, छत्रपती संभाजीनगर
याशिवाय, विसर्जनानंतर फुलं, हार-तोरण यांसारख्या पूजावस्तू निर्माल्य कलशात दान करण्याची व्यवस्था देखील करण्यात आली आहे.
नागरिकांना आवाहन
या उपक्रमाबाबत नगरपंचायत मुख्याधिकारी तथा प्रशासक डॉ. प्रविण निकम म्हणाले, “शहरातील गणेश भक्तांनी पर्यावरणपूरक गणेशोत्सव साजरा करून जलप्रदूषण टाळावे. कृत्रिम हौद व निर्माल्य कलशाचा उपयोग करून पर्यावरणाचे संरक्षण करण्यास हातभार लावावा.
