वडगाव मावळ पोलीस स्टेशनकडून बेवारस वाहनांबाबत जाहीर आवाहन; ७ दिवसांत मालकांनी संपर्क साधण्याचे आवाहन
वडगाव मावळ (प्रतिनिधी) : वडगाव मावळ पोलीस स्टेशनच्या हद्दीत बेवारस अवस्थेत पडून असलेल्या वाहनांबाबत पोलीस प्रशासनाने महत्त्वाचे पाऊल उचलले आहे. पोलीस निरीक्षक शंकर मनोहर पाटील यांनी यासंदर्भात जाहीर आवाहन करत संबंधित वाहनांच्या मूळ मालकांनी पुढे येण्याचे आवाहन केले आहे.
पोलीस स्टेशनच्या परिसरात विविध प्रकारची वाहने दीर्घकाळापासून बेवारस स्थितीत पडून असून, ती “मुद्देमाल निर्गती मोहिम” अंतर्गत विल्हेवाट लावण्याची प्रक्रिया सुरू करण्यात आली आहे. या पार्श्वभूमीवर संबंधित वाहन मालकांनी आपली वाहने ओळख पटवून घेण्यासाठी पुढाकार घेणे आवश्यक असल्याचे पोलीस प्रशासनाने स्पष्ट केले आहे.
या आवाहनानुसार, संबंधित वाहनांच्या मालकांनी आपल्या वाहनाची खात्री करून मूळ आर.सी. बुक व आधारकार्डसह ही प्रेस नोट प्रसिद्ध झाल्यापासून ७ दिवसांच्या आत वडगाव मावळ पोलीस स्टेशन येथे हजर राहावे. तसेच अधिक माहितीसाठी पोलीस निरीक्षक शंकर मनोहर पाटील (मो. ९०११०७९६२२) किंवा मुद्देमाल कारकून पोलीस हवालदार संदीप वंडाळे (मो. ९५९५५०६०१५) यांच्याशी संपर्क साधण्याचे आवाहन करण्यात आले आहे.
निर्धारित कालावधीत संबंधित वाहन मालकांनी संपर्क साधला नाही, तर संबंधित वाहनांवर कायदेशीर कारवाई करून त्यांचा लिलाव करण्यात येईल, असा इशाराही पोलीस प्रशासनाने दिला आहे.
दरम्यान, पोलीस स्टेशनमध्ये बेवारस अवस्थेत असलेल्या वाहनांचा तपशील स्वतंत्रपणे जाहीर करण्यात येणार असून, नागरिकांनी याकडे गांभीर्यानेलक्ष देऊन सहकार्य करावे, असे आवाहन करण्यात आले आहे.
