शिरगाव हद्दीमध्ये ५ वर्षीय मुलीचा अमानुष खून; आरोपी पोलिसांच्या ताब्यात
शिरगाव : मावळ तालुक्यातील शिरगाव पोलिस ठाण्याच्या हद्दीत आज एक धक्कादायक आणि हृदयद्रावक घटना समोर आली आहे. राहत्या घरापासून बेपत्ता झालेल्या ५ वर्षीय मुलीचा मृतदेह आज दुपारी आढळला. या मुलीला एका नराधमाने चॉकलेटचे अमिष देऊन तिच्यावर अत्याचार केला आणि त्यानंतर तिचा निर्घृण खून केला. पोलिसांनी आरोपीला ताब्यात घेतले असून, घटनेचा तपास सुरू आहे.
मिळालेल्या माहितीनुसार, शिरगाव येथील मुलीचे आईवडील एका खेळणी बनविणाऱ्या कारखान्यात काम करतात. काल सायंकाळी ते कामावरून घरी परतल्यानंतर त्यांना आपल्या मुलीचा काहीही पत्ता लागला नाही. त्यामुळे त्यांनी आपल्या मुलीला शोधायला सुरुवात केली. त्याचवेळी मुलीच्या गहिर्या शोधासाठी स्थानिक पोलिसांना कळवण्यात आले.
रात्रभर शोध घेतल्यानंतर, रविवारी दुपारी १२ वाजेच्या सुमारास पोलिसांना मुलीचा मृतदेह घरापासून काही अंतरावर असलेल्या झाडाझुडपात सापडला. मृतदेहावरून झालेल्या तपासानुसार, मुलीवर अत्याचार केल्यानंतर तिचा खून करण्यात आलेला होता. शवविच्छेदनासाठी मृतदेह शासकीय रुग्णालयात पाठवण्यात आला आहे.
घटनेचा अधिक तपास करत असताना पोलिसांनी परिसरातील सीसीटीव्ही कॅमेऱ्याची पाहणी केली, ज्यात ३० वर्षीय समीरकुमार मंडल( झारखंड) हा संशयित आरोपी पीडित मुलीला आपल्या सोबत घेऊन जातानाचे स्पष्टपणे दिसले. आरोपीने मुलीला चॉकलेटचे अमिष देऊन तिच्यावर अत्याचार केला आणि नंतर तिचा खून करून मृतदेह झाडात टाकला.
पोलिसांनी आरोपीला ताब्यात घेतले असून, शिरगाव पोलिस त्याच्या विरुद्ध कठोर कारवाई करत आहेत. आरोपीच्या ताब्यातून अधिक माहिती मिळवण्यासाठी त्याची कसून चौकशी सुरू आहे. याप्रकरणी पोलिसांनी गुन्हा नोंदवून पुढील तपास सुरू केला आहे.
या घटनेने शिरगाव परिसरात खळबळ माजली असून, नागरिकांना आपल्या मुलांच्या सुरक्षेसाठी अधिक जागरूक होण्याची गरज आहे, असे अनेक ग्रामस्थांनी मत व्यक्त केले.
प्रतिनिधी=गणेश नामदेव भेगडे.मो९९२१८०७०११
