सात वर्षांच्या प्रतीक्षेनंतर पिंपरी-चिंचवड पोलीस आयुक्तालयाला स्वतंत्र घटक झेंडा — आयुक्त विनयकुमार चौबे यांच्या प्रयत्नांना यश
पिंपरी : पिंपरी-चिंचवड पोलीस आयुक्तालयाच्या इतिहासातील एक महत्त्वपूर्ण अध्याय नोंदवला गेला आहे. स्थापना झाल्यानंतर तब्बल सात वर्षांच्या प्रतीक्षेनंतर अखेर या आयुक्तालयाला स्वतंत्र घटक झेंडा (Unit Flag) प्राप्त झाला आहे. पोलीस आयुक्त विनयकुमार चौबे यांच्या सातत्यपूर्ण प्रयत्नांमुळे आणि पाठपुराव्यामुळे १० नोव्हेंबर २०२५ रोजी राज्याचे पोलीस महासंचालक कार्यालयाने या झेंड्याला अधिकृत मान्यता दिली.
राज्यभरातील विविध जिल्हा पोलीस दलांना आणि पोलीस आयुक्तालयांना स्वतंत्र घटक झेंडे देण्यात आलेले आहेत. हे झेंडे महाराष्ट्र पोलीस दलाच्या ओळखीचा आणि अभिमानाचा एक भाग मानले जातात. विशेष म्हणजे, हे झेंडे राज्यस्तरीय महाराष्ट्र पोलीस कर्तव्य मेळावा, परेड, तसेच विविध स्पर्धांमध्ये पोलीस दलाचे प्रतिनिधित्व करताना अत्यंत प्रतिष्ठेने फडकवले जातात.
पिंपरी-चिंचवड पोलीस आयुक्तालयाची स्थापना १५ ऑगस्ट २०१८ रोजी झाली होती. परंतु तेव्हापासून आजपर्यंत या आयुक्तालयाकडे स्वतंत्र घटक झेंडा नव्हता. त्यामुळे राज्यातील इतर आयुक्तालयांप्रमाणे पिंपरी-चिंचवड पोलीस दलाला अधिकृत झेंडा घेऊन राज्यस्तरीय स्पर्धांमध्ये सहभागी होता येत नव्हते. ही उणीव दूर करण्यासाठी पोलीस आयुक्त विनयकुमार चौबे यांनी पुढाकार घेतला.
चौबे यांनी स्वतःच्या मार्गदर्शनाखाली पिंपरी-चिंचवड पोलीस आयुक्तालयाच्या घटक झेंड्याचे रेखाचित्र (डिझाइन) तयार केले. त्यामध्ये पोलीस दलाच्या मूल्यांचे, शौर्याचे आणि स्थानिक ओळखीचे प्रतीकात्मक रंग आणि चिन्हांचा समावेश करण्यात आला आहे. या प्रस्तावाचा सविस्तर अहवाल तयार करून त्यांनी राज्याच्या पोलीस महासंचालक कार्यालयाकडे मंजुरीसाठी पाठवला होता. त्यास अखेर १० नोव्हेंबर २०२५ रोजी अधिकृत मान्यता मिळाली.
या घटक झेंड्यामुळे पिंपरी-चिंचवड पोलीस आयुक्तालयाला स्वतःची स्वतंत्र ओळख प्राप्त झाली आहे. राज्यातील इतर मोठ्या आयुक्तालयांच्या बरोबरीने आता हे आयुक्तालयही अधिकृत झेंडा घेऊन विविध स्पर्धा, मिरवणुका आणि परेडमध्ये सहभागी होणार आहे. या झेंड्याचे अनावरण लवकरच विशेष समारंभात करण्यात येणार असल्याची माहिती मिळाली आहे.
पोलीस आयुक्त विनयकुमार चौबे यांनी या यशाबद्दल बोलताना सांगितले की,
“पिंपरी-चिंचवड पोलीस दल हे वेगाने विकसित होणाऱ्या शहराच्या सुरक्षेचे बळ आहे. स्वतंत्र घटक झेंडा म्हणजे या दलाची ओळख आणि आत्मसन्मान. हा झेंडा फक्त कापडाचा तुकडा नसून आमच्या जबाबदारीचे आणि कर्तव्यनिष्ठेचे प्रतीक आहे.”
सात वर्षांच्या प्रतीक्षेनंतर मिळालेल्या या मान्यतेमुळे संपूर्ण पिंपरी-चिंचवड पोलीस दलात उत्साहाचे वातावरण आहे. हा घटक झेंडा आता पुढील काळात दलाच्या गौरवशाली परंपरेचे आणि सेवाभावाचे प्रतीक ठरणार आहे.
प्रतिनिधी=गणेश नामदेव भेगडे.मो९९२१८०७०११
