वडगाव नगरपंचायतीकडे सीसीटीव्ही सुरू करण्याची मागणी; नगरसेवकांनी दिले निवेदन
वडगाव मावळ : शहरातील मुख्य रस्त्यांवरील बंद पडलेले सीसीटीव्ही कॅमेरे तातडीने सुरू करावेत, या मागणीसाठी नगरसेवक विशाल वसंतराव वहिले व नगरसेवक आनंता कुडे यांनी नगरपंचायतीच्या कार्यालयीन अधीक्षक मनीषा चव्हाण यांना निवेदन सादर केले.
शहरातील मुख्य रस्त्यांवर बसविण्यात आलेले सीसीटीव्ही कॅमेरे गेल्या अनेक महिन्यांपासून बंद अवस्थेत असल्याने चोरी, छेडछाड तसेच इतर गुन्हेगारी प्रकार वाढत असल्याची नागरिकांची तक्रार आहे. विशेषतः सायंकाळनंतर महिलांना व विद्यार्थिनींना ये-जा करताना असुरक्षिततेची भावना निर्माण होत असल्याचे नगरसेवकांनी निवेदनात नमूद केले आहे.
निवेदनात पुढे म्हटले आहे की, सीसीटीव्ही कॅमेरे सुरू असल्यास गुन्हेगारांवर नियंत्रण ठेवण्यास मदत होते तसेच कोणत्याही घटनेचा तपास करणे सोपे होते. त्यामुळे शहराच्या सुरक्षेच्या दृष्टीने सर्व बंद कॅमेरे तात्काळ दुरुस्त करून कार्यान्वित करावेत, अशी मागणी करण्यात आली.
यावेळी संबंधित विभागाने या मागणीची दखल घेऊन लवकरात लवकर आवश्यक कार्यवाही करण्याचे आश्वासन दिल्याची माहिती नगरसेवकांनी दिली.
