मावळात राष्ट्रवादीचा कृतज्ञता मेळावा; आमदार सुनील शेळके यांचा भाजप नेत्यांवर निशाणा
मावळ : जिल्हा परिषद व पंचायत समिती निवडणुकांमध्ये १५ पैकी १५ जागांवर दणदणीत विजय मिळवल्यानंतर वडगाव मावळ येथे राष्ट्रवादी काँग्रेस पार्टीच्या वतीने कृतज्ञता मेळाव्याचे आयोजन करण्यात आले. या मेळाव्याला कार्यकर्त्यांची मोठी उपस्थिती होती.
यावेळी बोलताना आमदार सुनील शेळके यांनी भाजपाच्या स्थानिक नेत्यांवर नाव न घेता जोरदार टीकास्त्र सोडले. निवडणुकीदरम्यान ईव्हीएम मशीन हॅक करण्याच्या नावाखाली काही भाजप नेत्यांनी उमेदवारांकडून २५ ते ३५ लाख रुपये घेत “तुम्हाला निवडून आणतो” असे आश्वासन दिल्याचा गंभीर आरोप त्यांनी केला.
या प्रकरणाची थेट मुख्यमंत्री स्तरावर चौकशी व्हावी, अशी मागणीही शेळके यांनी यावेळी केली. “लोकशाही प्रक्रियेला काळिमा फासणाऱ्या अशा प्रकारांना आळा घालण्यासाठी सखोल चौकशी आवश्यक आहे,” असे ते म्हणाले.
मेळाव्यात विजय मिळवून देणाऱ्या मतदारांचे आभार मानण्यात आले. कार्यकर्त्यांच्या एकजुटीमुळेच हा ऐतिहासिक विजय शक्य झाल्याचे सांगत आगामी काळात विकासकामांना गती देण्याचा निर्धारही नेत्यांनी व्यक्त केला.
या कार्यक्रमास पक्षाचे पदाधिकारी, निवडून आलेले सदस्य, कार्यकर्ते आणि नागरिक मोठ्या संख्येने उपस्थित होते
