घोरावडेश्वर डोंगररांगेत सकाळच्या फेरीत ‘तरसा’चे अचानक दर्शन; नागरिकांमध्ये भीती.
शिरगाव : घोरावडेश्वर डोंगराच्या पायथ्यालगतच्या गहुंजे येथे अरण्यभागात बुधवारी सकाळी साडेसहा वाजताच्या सुमारास ‘तरस (हायना) दिसल्याची घटना उघडकीस आली. मॉर्निंग वॉक साठी नित्यनेमाने या परिसरात येणाऱ्या काही नागरिकांना झुडपांत हालचाल जाणवताच त्यांनी लक्ष देत निरखून पाहिले. त्यावेळी हा वन्यप्राणी तेथे दिसून आला. काही क्षण उपस्थित राहिल्यानंतर तरस पुन्हा अरण्यात गायब झाला.
घटनेनंतर परिसरात खळबळ निर्माण झाली. स्थानिकांनी याबाबत वनविभागाला तत्काळ खबर दिली. वनाधिकारी व कर्मचारी तातडीने घटनास्थळी पोहोचले व परिस्थितीचा आढावा घेतला. नागरिकांनी शांत राहावे, तसेच डोंगरमाथ्यावर किंवा एकांत अरण्यपथावर जाण्याचे टाळावे, असे आवाहन त्यांच्याकडून करण्यात आले.
वनरक्षक योगेश कोकाटे म्हणाले, “तरस स्वभावतः मनुष्यावर हल्ला करत नाही. तो सहसा मृतप्राण प्राण्यांवर जगतो व माणसांपासून दूर राहणे पसंत करतो. काहीही धोका नसताना त्याला घाबरण्याची गरज नाही. मात्र कोणत्याही अपरिचित वन्यप्राण्यावर दगडफेक, काठीने खोंचणे किंवा मागे धाव घेणे अशा कृती टाळल्या पाहिजेत.”
घोरावडेश्वर परिसर हा जैवविविधतेने समृद्ध असून येथे तरसाबरोबर मोर, ससे, कोल्हे, विविध सरपटणारे प्राणी यांचे वास्तव्य आहे. गेल्या काही महिन्यांत वन्यप्राण्यांची हालचाल किंचित वाढलेली दिसत असल्याने नागरिकांमध्ये संभ्रमाचे वातावरण निर्माण झाले आहे. काहींनी तर डोंगररांगांमध्ये वेगवेगळ्या पाउलखूणा दिसल्याचे सांगितले.
सकाळी फेरी मारणाऱ्या नागरिकांनी मात्र या घटनेचा व्हिडिओ किंवा फोटो काढण्याच्या नादात वन्यप्राण्यांना त्रास देऊ नये, असे वनविभागाने स्पष्ट आवाहन केले आहे. अलीकडे सोशल मीडियावर वन्यप्राणी दिसल्याची माहिती लगेच प्रसारित होत असल्याने लोकांची गर्दी होण्याची शक्यता वाढते आणि त्यामुळे प्राण्यांनाही त्रास होतो, असेही अधिकाऱ्यांनी सांगितले.
वनविभागाकडून परिसरातील गस्त वाढविण्यात आली असून नागरिकांना समूहाने चालण्याचा सल्ला देण्यात आला आहे. एकीकडे डोंगर परिसरातील वाढती हिरवाई व शांत वातावरणामुळे वन्यप्राण्यांची वस्ती नैसर्गिकरीत्या वाढत असली तरी त्यांच्यात आणि नागरिकांत सुरक्षित अंतर राखणे अत्यावश्यक असल्याचे मत तज्ज्ञांनी व्यक्त केले आहे.
नागरिकांनी घाबरूण न जाता सुरक्षितता नियमांचे पालन करावे, तसेच कोणतीही संशयास्पद हालचाल दिसल्यास तात्काळ वनविभागाला माहिती द्यावी, असे आवाहन करण्यात आले आहे.
प्रतिनिधी=गणेश नामदेव भेगडे.मो९९२१८०७०११
