जर्मन भाषा गुरु’ हे पुस्तक विद्यार्थ्यांच्या उज्ज्वल भविष्यासाठी प्रेरणादायी दीपस्तंभ .पत्रकार विलास भेगडे
तळेगाव दाभाडे : परदेशी भाषांचे ज्ञान आजच्या स्पर्धात्मक युगात यशाची गुरुकिल्ली ठरते. अशा काळात विद्यार्थ्यांसाठी ‘जर्मन भाषा गुरु’ हे पुस्तक एक प्रकाशदीप ठरत आहे. “विद्यार्थ्यांनी हे पुस्तक मनापासून वाचावे, त्यातील मार्गदर्शन आत्मसात करावे आणि ज्ञानाच्या नव्या क्षितिजांकडे आत्मविश्वासाने वाटचाल करावी,” असे प्रतिपादन ज्येष्ठ पत्रकार आणि तळेगाव दाभाडे प्रेस फाऊंडेशनचे अध्यक्ष विलास भेगडे यांनी केले.
‘जर्मन भाषा गुरु’ या पुस्तकाचा प्रकाशन सोहळा नुकताच आकुर्डी येथे पार पडला. या कार्यक्रमाचे उद्घाटन करिअर हब टेक्नॉलॉजीजचे संस्थापक व प्राचार्य कैलास गाठे यांच्या हस्ते झाले. प्रमुख पाहुणे म्हणून डॉ. दिलीप पांडुरंग देशमुख (डी. वाय. पाटील विद्यापीठ, आंबी, पुणे), समाजसेवक चंद्रकांत दामोदर कुलकर्णी, विजय पाटील, गोविंद पाटील तसेच विशेष अतिथी म्हणून लोकमत, पिंपरी-चिंचवडचे वरिष्ठ उपसंपादक योगेश्वर माडगूळकर उपस्थित होते.
आपल्या मनोगतात बोलताना माडगूळकर म्हणाले, “‘जर्मन भाषा गुरु’ हे केवळ पुस्तक नसून, विद्यार्थ्यांच्या मनात आत्मविश्वासाचा दीप प्रज्वलित करणारा ग्रंथ आहे. मराठी भाषेतून परदेशी भाषा शिकविण्याचे धाडस गाठे सरांनी केले, हे मराठी माध्यमातील विद्यार्थ्यांसाठी अभिमानास्पद आहे. ज्या भाषेत आपण विचार करतो, त्याच भाषेत शिकणे आणि शिकविणे हे ज्ञान अधिक गहिरे करते.”
डॉ. देशमुख यांनी विद्यार्थ्यांच्या यशाचा गौरव करताना म्हटले, “प्रत्येक यशामागे शिक्षकांचा कष्ट आणि विद्यार्थ्यांचा परिश्रम दडलेला असतो. या पुस्तकाच्या माध्यमातून अनेक विद्यार्थ्यांना नव्या वाटा खुल्या होतील आणि त्यांच्या करिअरची दिशा बदलू शकेल.”
कार्यक्रमात करिअर हब टेक्नॉलॉजीजच्या शिक्षकवर्गातील क्षेता गाठे, गणेशा आनोराये, कृष्णाकांत सरनाईक, अनिकेत सूर्यवंशी आदी उपस्थित होते. सर्व शिक्षकांनी एकमताने सांगितले की, “हे पुस्तक केवळ भाषा शिकविणारे नाही, तर विद्यार्थ्यांना आत्मनिर्भरतेकडे नेणारे आहे.”
कार्यक्रमाच्या समारोपात प्राचार्य कैलास गाठे यांनी सर्व मान्यवरांचे आभार मानले. त्यांनी सांगितले, “हे पुस्तक विद्यार्थ्यांसाठी दिशा दाखवणारे दीप आहे. परदेशी शिक्षण, रोजगार आणि वैयक्तिक प्रगतीसाठी जर्मन भाषा आज अत्यंत उपयुक्त ठरत आहे. ‘जर्मन भाषा गुरु’ या पुस्तकाच्या माध्यमातून मराठी विद्यार्थ्यांना ती सहज शिकता येईल, हे आमचे ध्येय आहे.”
उपस्थित प्रेक्षकांमध्ये विद्यार्थ्यांचा, पालकांचा आणि शिक्षकांचा उत्साह ओसंडून वाहत होता. प्रत्येकाच्या चेहऱ्यावर नव्या आशेचा, नव्या स्वप्नांचे तेज झळकत होते. ‘जर्मन भाषा गुरु’ हे पुस्तक विद्यार्थ्यांच्या जीवनात प्रेरणा, आत्मविश्वास आणि यशाचा मार्ग दाखवणारा दीप बनो, हीच सर्वांची भावना होती.
प्रतिनिधी=गणेश नामदेव भेगडे.मो९९२१८०७०११
