तळेगाव दाभाडे नगरपरिषदेच्या निवडणुकीच्या पार्श्वभूमीवर पोलिस दल ॲक्शन मोडवर.माॅक ड्रिल द्वारे सज्जतेची तपासणी
तळेगाव दाभाडे : आगामी तळेगाव दाभाडे नगरपरिषदेच्या निवडणुकीच्या पार्श्वभूमीवर परिसरात कायदा व सुव्यवस्था राखण्यासाठी पोलिस दल पूर्णपणे सज्ज झाले आहे. निवडणूक काळात कोणत्याही अनुचित घटना घडू नयेत, शांततेचे वातावरण टिकून राहावे आणि नागरिकांत सुरक्षिततेचा विश्वास निर्माण व्हावा, या उद्देशाने पोलिसांनी माॅक ड्रिल (Mock Drill) आयोजित करून तयारीची कसोटी पाहिली.
या सराव मोहिमेत देहूरोड, तळेगाव दाभाडे, तळेगाव एमआयडीसी आणि शिरगाव पोलीस स्टेशनचे अधिकारी व अंमलदार मोठ्या संख्येने सहभागी झाले होते. माॅक ड्रिल दरम्यान दंगल नियंत्रण, जमाव व्यवस्थापन, वाहतूक नियंत्रण तसेच आपत्कालीन परिस्थितीत प्रतिसाद देण्याची प्रक्रिया अंमलात आणण्यात आली.
या संदर्भात तळेगाव दाभाडे पोलीस स्टेशनचे वरिष्ठ पोलीस निरीक्षक कन्हैयालाल थोरात म्हणाले,
“आगामी निवडणुका शांततेत, निष्पक्ष आणि पारदर्शक वातावरणात पार पडाव्यात, यासाठी पोलीस दल पूर्ण तयारीत आहे. कायदा व सुव्यवस्था राखणे ही आमची प्राथमिक जबाबदारी आहे. नागरिकांनीही पोलिस प्रशासनाला सहकार्य करून निवडणूक प्रक्रिया सुरळीत पार पाडावी, अशी आमची विनंती आहे.”
थोरात यांनी पुढे सांगितले की, सर्व पोलीस अधिकारी व अंमलदारांना आवश्यक दिशा-निर्देश देण्यात आले आहेत. गस्त वाढविणे, संवेदनशील भागांवर विशेष लक्ष ठेवणे, आणि आपत्कालीन परिस्थितीला तत्काळ प्रतिसाद देण्यासाठी दल सज्ज ठेवणे या उपाययोजना राबविण्यात येत आहेत.
तसेच, पिंपरी चिंचवड पोलीस आयुक्तालयाच्या आदेशानुसार निवडणुकीपूर्वी वेळोवेळी अशाच प्रकारे माॅक ड्रिलचे आयोजन करण्यात येणार आहे, जेणेकरून कोणत्याही परिस्थितीत पोलिस दल तत्पर राहील.
तळेगाव परिसरात सध्या निवडणुकीचे वातावरण तापले असले तरी पोलिसांच्या या सक्रिय तयारीमुळे नागरिकांमध्ये दिलासा आणि विश्वास निर्माण झाला आहे. कायदा व सुव्यवस्थेच्या अंमलबजावणीसाठी पोलिस प्रशासनाच्या सज्जतेचा हा सराव म्हणजेच निवडणुकीच्या शांततेचा पाया ठरत आहे.
प्रतिनिधी=गणेश नामदेव भेगडे.मो.९९२१८०७०११
