दिग्विजय मित्र मंडळ आयोजित रक्तदान व नेत्र तपासणी शिबिरास उत्स्फूर्त प्रतिसाद
वडगाव मावळ : वडगाव मावळ येथील दिग्विजय मित्र मंडळाचे माजी अध्यक्ष ओंकार नितीन भांगरे यांच्या वाढदिवसानिमित्त दिनांक ८ फेब्रुवारी रोजी आयोजित करण्यात आलेल्या रक्तदान व मोफत नेत्र तपासणी शिबिरास स्थानिक नागरिकांनी उत्स्फूर्त प्रतिसाद दिला. समाजोपयोगी उपक्रमाच्या माध्यमातून वाढदिवस साजरा करण्याचा आदर्श यावेळी पाहायला मिळाला.
या रक्तदान शिबिराचे हे तिसरे वर्ष असून यंदा तब्बल ४९ रक्तदात्यांनी रक्तदान करून सामाजिक बांधिलकी जपली. पिंपरी येथील पिंपरी–चिंचवड ब्लड बँक यांच्या सहकार्याने हे रक्तदान शिबिर यशस्वीरीत्या पार पडले. यासोबतच चिंचवड येथील ईशा नेत्रालय यांच्या वतीने मोफत नेत्र तपासणी शिबिराचे आयोजन करण्यात आले होते. या शिबिरात मोठ्या संख्येने नागरिकांनी आपल्या डोळ्यांची तपासणी करून तज्ज्ञ डॉक्टरांकडून योग्य सल्ला घेतला.
या शिबिराचे उद्घाटन वडगाव नगरपंचायतीच्या नगराध्यक्षा अबोली ढोरे व उपनगराध्यक्ष सुनील ढोरे यांच्या शुभहस्ते करण्यात आले. यावेळी नगरसेवक अजय म्हाळसकर, विशाल वहिले, अजय भवार, सुनिता ढोरे, आकांक्षा वाघवले, पुनम भोसले यांनी उपस्थित राहून आयोजकांचे कौतुक करत शुभेच्छा दिल्या.
तसेच ग्रामदैवत पोटोबा महाराज देवस्थानचे मुख्य विश्वस्त किरण भिलारे, उद्योजक गणेश भेगडे, गणेश वहिले, विकी भोसले, दिलीपजी भिलारे यांची प्रमुख उपस्थिती लाभली.
या उपक्रमाच्या यशस्वी आयोजनासाठी प्रशांत घुमटकर, प्रसाद भेगडे, श्रीधर भेगडे, केतन पोते, चेतन हुले, ऋषिकेश भोंडवे, साईराज खेंगले, यश नखाते, अजय देडे, आदित्य भेगडे, साई भांगरे, श्रेयस दरेकर, ओम खेंगरे, दिनेश म्हाळसकर, ओंकार घारे, अजय जाधव व अथर्व खेंगले यांनी विशेष परिश्रम घेतले.
यावेळी बोलताना शिबिराचे मुख्य आयोजक ओंकार भांगरे म्हणाले,
“आपला वाढदिवस हा केवळ वैयक्तिक आनंदाचा क्षण न राहता तो कोणाच्या तरी जीवनासाठी उपयोगी ठरावा, या भावनेतून दरवर्षी हा उपक्रम राबविला जातो. समाजसेवा हाच माझ्या वाढदिवसाचा खरा अर्थ आहे.”
सामाजिक भान जपत राबविण्यात आलेल्या या उपक्रमामुळे दिग्विजय मित्र मंडळाचे सर्वत्र कौतुक होत असून, अशा उपक्रमांतून समाजात सकारात्मक संदेश जात असल्याची भावना नागरिकांतून व्यक्त होत आहे.
