वडगाव मावळमध्ये श्री पाचपावली खंडोबा मंदिरात चंपाषष्ठी उत्सवाची तयारी जोरात
वडगाव मावळ, जि. पुणे श्री पाचपावली खंडोबा मंदिर देवस्थानात यंदाचा पारंपरिक चंपाषष्ठी उत्सव २०२५ उत्साहात साजरा होणार असून भाविकांमध्ये मोठी उत्सुकता पाहायला मिळत आहे. मर्गशीर्ष शुद्ध षष्ठी अर्थात चंपाषष्ठी निमित्ताने बुधवार, दि. २६ नोव्हेंबर २०२५ रोजी दिवसभर विविध धार्मिक कार्यक्रमांचे आयोजन करण्यात आले आहे.
मंदिर समितीने दिलेल्या माहितीनुसार सकाळपासूनच मंदिर परिसरात भाविकांची गर्दी अपेक्षित आहे. सकाळी ७ वाजता श्री खंडोबा महाराजांचा अभिषेक या पारंपरिक विधीने उत्सवाला प्रारंभ होईल. त्यानंतर सकाळी ८.३० वाजता महाआरती, तर सायंकाळी ७ वाजता पाचपावली हा खास कार्यक्रम होणार आहे.
रात्रीच्या सत्रातही भक्तिमय वातावरण कायम राहणार असून रात्री ८ वाजता महाआरती, त्यानंतर रात्री ८.३० वाजता महाप्रसाद भाविकांसाठी ठेवण्यात आला आहे. शेवटी रात्री १० वाजता जागरण व गोंधळ कार्यक्रमाने दिवसाचा समारोप होणार आहे.
या उत्सवानिमित्त मंदिर आकर्षक फुलोऱ्याने सजविण्यात आले असून दर्शनासाठी विशेष व्यवस्था करण्यात आली आहे. महिला, ज्येष्ठ नागरिक आणि लहान मुलांसाठी स्वतंत्र रांगा, तसेच पार्किंगची सोय मंदिर समितीने केली आहे.
‘सर्व भाविकांनी उत्सवात सहभागी होऊन कार्यक्रमाची शोभा वाढवावी’, असे आवाहन श्री पाचपावली खंडोबा मंदिर देवस्थान यांच्याकडून करण्यात आले आहे.
चंपाषष्ठी उत्सवाच्या पारंपरिक वातावरणामुळे वडगाव मावळ परिसर भक्तिमय आणि उत्साहपूर्ण होण्याची अपेक्षा व्यक्त होत आहे.
