आर्यन दाभाडेची राज्यस्तरीय शालेय कुस्ती स्पर्धेसाठी निवड
तळेगाव दाभाडे : येथील सह्याद्री इंग्लिश मीडियम स्कूलचा विद्यार्थी आर्यन विक्रम दाभाडे (इ. ८ वी) याने जिल्हास्तरावर चमकदार कामगिरी करत राज्यस्तरीय शालेय कुस्ती स्पर्धेसाठी पात्रता मिळवली आहे.
जिल्हा क्रीडा कार्यालय आयोजित शालेय कुस्ती स्पर्धेत, १७ वर्षांखालील मुलांच्या ७१ किलो वजनगटात आर्यनने उत्कृष्ट कुस्ती कौशल्य दाखवत प्रतिस्पर्ध्यांवर मात केली. दमदार चाली, अचूक तंत्र आणि आत्मविश्वासपूर्ण खेळामुळे त्याने सर्वांचे लक्ष वेधून घेतले. या प्रभावी प्रदर्शनाच्या जोरावर आर्यनची निवड पुणे विभागीय स्तरावरील शालेय क्रीडा कुस्ती स्पर्धेसाठी करण्यात आली आहे.
आर्यनच्या या यशामागे क्रीडा शिक्षक हर्षल मुळे यांचे मार्गदर्शन आणि सततचे प्रशिक्षण महत्त्वाचे ठरले आहे. नियमित सराव, शिस्तबद्ध जीवनशैली आणि पालकांचा पाठिंबा या सर्व घटकांमुळे आर्यनने हे यश मिळवले आहे.
शाळेचे संस्थापक गणेश किशनराव भेगडे, अध्यक्ष सुनील बबनराव भेगडे, सचिव दत्तात्रय पंढरीनाथ नाटक, मुख्याध्यापिका रंजिता थंपी तसेच शिक्षकवर्ग आणि कर्मचारी यांनी आर्यनचे मनःपूर्वक अभिनंदन केले. शाळेच्या परिसरात आनंदाचे वातावरण निर्माण झाले असून सर्वांनी आर्यनला राज्यस्तरीय स्पर्धेतही विजयी होण्यासाठी शुभेच्छा दिल्या आहेत.
( प्रतिनिधी – गणेश नामदेव भेगडे) ९९२१८०७०११
