पुणे जिल्हा परिषदेच्या मावळ तालुक्यातील पाच गटांचे आरक्षण जाहीर
टाकवे, इंदोरी, खडकाळे, कुरूळगाव, सोमाटणे गटांमध्ये बदलते राजकीय समीकरण
मावळ (प्रतिनिधी) : पुणे जिल्हा परिषदेच्या आगामी निवडणुकीसाठी मावळ तालुक्यातील पाच गटांचे आरक्षण अखेर जाहीर झाले आहे. या आरक्षण सोडतीनंतर मावळ तालुक्यातील राजकीय वर्तुळात चांगलीच खळबळ उडाली असून, अनेक इच्छुक उमेदवारांनी सुटकेचा श्वास घेतला आहे.
या आरक्षणामुळे मावळमधील राजकीय गणितांमध्ये मोठे बदल होण्याची शक्यता आहे. काही गटांमध्ये महिलांसाठी आरक्षण लागू झाल्याने नव्या महिला नेतृत्वाला संधी मिळणार आहे, तर काही ठिकाणी पुरुषांसाठी राखीव जागा आल्याने स्पर्धा अधिक रंगतदार होण्याची चिन्हे आहेत.
दरम्यान, जिल्हा परिषद अध्यक्षपदाचे आरक्षण काही दिवसांपूर्वीच सर्वसाधारण गटासाठी जाहीर झाले होते. त्यामुळे गटांच्या आरक्षणाबाबतची उत्सुकता शिगेला पोहोचली होती. अखेर आज सोडत जाहीर होताच, मावळमधील अनेक उमेदवारांमध्ये “आपल्याला हवे तसे आरक्षण मिळाले” या आनंदाचे वातावरण दिसून आले.
जिल्हा परिषद आणि पंचायत समिती या दोन्ही पातळ्यांवर आता राजकीय हालचालींना वेग आला आहे. इच्छुक उमेदवारांच्या प्रचारयोजना, बैठका आणि संपर्क मोहिमा सुरू झाल्याचे समजते.
स्थानिक कार्यकर्त्यांच्या म्हणण्यानुसार, “या सोडतीनंतर मावळ तालुक्याचा राजकीय नकाशा काही अंशी बदलण्याची शक्यता आहे. काही गटांमध्ये नवे चेहरे पुढे येतील, तर काही ठिकाणी जुने बालेकिल्ले राखण्यासाठी प्रयत्न सुरू होतील.”
जाहीर झालेल्या पाच गटांचे आरक्षण पुढीलप्रमाणे आहे –
टाकवे गट – अनुसूचित जमाती (पुरुष)
इंदोरी गट – सर्वसाधारण (महिला)
खडकाळे गट – सर्वसाधारण (महिला)
कुसगांव ब्रु गट – सर्वसाधारण (पुरुष)
सोमाटणे गट – सर्वसाधारण (महिला)
