वडगाव शहरात भटक्या कुत्र्यांचा त्रास; नागरिकांमध्ये भीतीचे वातावरण
वडगाव, ता. मावळ :
शहरामध्ये दिवसेंदिवस भटक्या कुत्र्यांची संख्या वाढत असून नागरिकांच्या दैनंदिन जीवनात भीतीचे वातावरण निर्माण झाले आहे. शाळेत जाणारी लहान मुले, सकाळी फिरायला जाणारे ज्येष्ठ नागरिक तसेच रस्त्यावरून जाणाऱ्या सर्वसामान्य नागरिकांना या भटक्या कुत्र्यांचा त्रास सहन करावा लागत आहे.
या पार्श्वभूमीवर मावळ तालुका राष्ट्रवादी काँग्रेसचे वरिष्ठ उपाध्यक्ष पंढरीनाथ ढोरे यांनी नगरपंचायतीचे लक्ष वेधले आहे. “जर भटक्या कुत्र्यांनी नागरिकांना चावा घेतला, तर त्याचा संपूर्ण वैद्यकीय खर्च नगरपंचायतीने करावा,” अशी ठाम मागणी त्यांनी केली आहे.
ढोरे यांनी पुढे सांगितले की, “नगरपंचायत प्रशासनाने तातडीने भटक्या कुत्र्यांच्या नियंत्रणासाठी उपाययोजना राबवाव्यात. नसबंदी मोहीम, जनावरांसाठी आश्रयस्थळांची सोय, तसेच नागरिकांच्या सुरक्षेसाठी विशेष पथके तयार करणे आवश्यक आहे. उशीर न करता जर या प्रश्नावर तोडगा काढला नाही, तर नागरिकांच्या आरोग्याला आणि सुरक्षिततेला गंभीर धोका निर्माण होऊ शकतो.”
सध्या शहरात अनेक भागांत भटक्या कुत्र्यांच्या टोळ्या फिरताना दिसतात. रात्री उशिरा घरी परतणाऱ्या नागरिकांना कुत्र्यांचा पाठलाग करण्याचे प्रकार घडत असून अपघाताचीही शक्यता वाढली आहे.
या समस्येवर नगरपंचायतीने तातडीने ठोस पावले उचलून शहरात भीतीऐवजी सुरक्षिततेचे वातावरण निर्माण करावे, अशी अपेक्षा नागरिकांनी व्यक्त केली आहे.
