सह्याद्री नामा | वडगाव मावळ | दि. २३
कामशेत येथे शेतकरी भवन उभारणीसाठी निधीची मागणी; मंत्री बाबासाहेब पाटील यांचे सकारात्मक आश्वासन
वडगाव मावळ : मावळ तालुका सहकारी खरेदी-विक्री संस्थेच्या कामशेत येथील जागेवर शेतकरी भवन उभारण्यासाठी आवश्यक निधी उपलब्ध करून द्यावा, अशी मागणी महाराष्ट्र राज्याचे सहकार मंत्री बाबासाहेब पाटील यांच्याकडे करण्यात आली आहे. या मागणीवर मंत्री पाटील यांनी तात्काळ सकारात्मक प्रतिसाद देत निधी मंजूर करण्याचे आश्वासन दिल्याची माहिती संस्थेचे सभापती किरण हुलावळे व उपसभापती सुनीता अमोल केदारी यांनी दिली.
आमदार सुनील शेळके यांच्या मार्गदर्शनाखाली खरेदी-विक्री संघाचे पदाधिकारी व संचालक मंडळाने मुंबई येथील मंत्रालयात मंत्री पाटील यांची भेट घेऊन सविस्तर निवेदन सादर केले. यावेळी सभापती किरण हुलावळे, उपसभापती सुनीता केदारी यांच्यासह संचालक माणिक गाडे, शहाजी कडू, गणेश विनोदे, बाजीराव वाजे, प्रमोद दळवी, शरद नखाते, विष्णु घरदाळे, आशा मारुती खांडभोर तसेच सचिव किरण लोहर उपस्थित होते.
कामशेत येथील संस्थेची जागा ही मध्यवर्ती व प्रशस्त असून सध्या याठिकाणी गोडाऊन, दुकाने आणि कार्यालयीन इमारती आहेत. मात्र या इमारती जीर्ण व धोकादायक अवस्थेत असून, त्याच ठिकाणाहून संस्थेचे विविध कामकाज सुरू आहे. तसेच मूलभूत सुविधांचा अभाव आणि अपुरी जागा यामुळे कार्यक्षमतेवर परिणाम होत असल्याचे निवेदनात नमूद करण्यात आले आहे.
यामुळे याच ठिकाणी आधुनिक शेतकरी भवन उभारल्यास मावळ तालुक्यातील शेतकरी बांधवांना विविध सेवा एकाच छताखाली उपलब्ध होतील. शेतकऱ्यांसाठी बैठक व्यवस्था, मार्गदर्शन केंद्र, साठवण सुविधा यांसारख्या सोयी निर्माण होऊन संस्थेची कार्यक्षमता व दर्जाही उंचावेल, असा विश्वास पदाधिकाऱ्यांनी व्यक्त केला.
दरम्यान, मंत्री बाबासाहेब पाटील यांनी या प्रस्तावाची गांभीर्याने दखल घेत लवकरात लवकर निधी उपलब्ध करून देण्याचे आश्वासन दिल्याने शेतकरी वर्गात समाधानाचे वातावरण निर्माण झाले आहे.
