वडगाव मावळात शिक्षणासाठी पुढाकार – उपनगराध्यक्ष सुनिलभाऊ ढोरे यांची न्यू इंग्लिश स्कूलला मदतीचा हात
वडगाव मावळ दिनांक : २१ एप्रिल २०२६ येथील न्यू इंग्लिश स्कूलला उपनगराध्यक्ष सुनिलभाऊ ढोरे यांनी दिलेल्या भेटीत शाळेच्या विकासासाठी महत्त्वपूर्ण निर्णय घेत विद्यार्थ्यांसाठी तत्काळ मदतीचा हात पुढे केला. या भेटीदरम्यान शाळेचे मुख्याध्यापक श्री. हाके सर यांनी शाळेसमोरील विविध अडचणींबाबत सविस्तर माहिती दिली.
मुख्याध्यापकांनी मांडलेल्या समस्यांची दखल घेत उपनगराध्यक्ष ढोरे यांनी तात्काळ शाळेसाठी पाच संगणक संच उपलब्ध करून दिले, ज्यामुळे विद्यार्थ्यांना आधुनिक शिक्षणाची सुविधा मिळणार आहे. तसेच, मुला-मुलींसाठी स्वतंत्र डिजिटल टॉयलेटची सुविधा लवकरच सुरू करण्यात येणार असल्याचेही त्यांनी आश्वासन दिले.
शाळेत पाण्याच्या समस्येबाबतही त्यांनी तत्परता दाखवत नगरपंचायत कर्मचाऱ्यांना तातडीने सूचना दिल्या. संबंधित कर्मचाऱ्यांनी लगेचच काम हाती घेऊन पाण्याचा प्रश्न सोडवला, त्यामुळे शाळेतील विद्यार्थ्यांना दिलासा मिळाला आहे.
यावेळी उपनगराध्यक्ष ढोरे यांनी भविष्यातही शाळेसाठी आवश्यक त्या सर्व सुविधा उपलब्ध करून देण्याचे आश्वासन देत, “विद्यार्थ्यांच्या शिक्षणात कोणतीही अडचण येऊ देणार नाही,” असे स्पष्ट केले.
या सर्व कामांबद्दल मुख्याध्यापक हाके सर, शिक्षकवर्ग आणि विद्यार्थ्यांनी समाधान व्यक्त करत उपनगराध्यक्ष सुनिलभाऊ ढोरे यांचा शाळेच्या वतीने सन्मान केला.
कार्यक्रमाच्या शेवटी उपनगराध्यक्ष ढोरे यांनी विद्यालयाच्या विकासासाठी सहकार्य करणाऱ्या मुख्याध्यापक, शिक्षकवर्ग आणि नगरपंचायत कर्मचाऱ्यांचे मनःपूर्वक आभार मानले.
