किवळे एक्सप्रेस-वेवरील पुलाखाली अज्ञात महिलेचा मृतदेह; परिसरात खळबळ, पोलिसांचा जलदगतीने तपासाला सुरुवात
किवळे : येथील एक्सप्रेस वे महामार्गावरील सर्व्हिस रोड शेजारील पुलाखाली शनिवारी (ता. १५) दुपारच्या सुमारास अंदाजे ३५ वर्षीय महिलेचा संशयास्पद मृतदेह आढळून आला. अचानक उघडकीस आलेल्या या घटनेने परिसरात खळबळ उडाली असून मृत्यूचा संशयास्पद स्वरूप पाहता पोलिसांनी तातडीने तपासाला सुरुवात केली आहे.
प्राथमिक पाहणीदरम्यान मृतदेहावर कोणतीही ओळख पटवणारी माहिती मिळाली नाही. त्यामुळे ही महिला बाहेरील भागातील असण्याची शक्यता पोलिसांनी व्यक्त केली आहे. घटनेत गुन्हेगारीचा तपास करण्यासाठी पोलिसांनी घटनास्थळाचा पंचनामा करून सर्व शक्यता तपासण्यास सुरुवात केली आहे.
मृतदेह शासकीय रुग्णालयात शवविच्छेदनासाठी पाठविण्यात आला असून मृत्यूचे नेमके कारण समोर येण्यासाठी पोस्टमार्टम अहवालाची प्रतीक्षा आहे. प्राथमिक तपासात मृत्यूचे कारण स्पष्ट झाले नसल्याने पोलिसांनी गुन्हा नोंदवण्याची प्रक्रिया सुरू ठेवत तपास अधिक वेगाने पुढे नेला आहे.
घटनेचे गांभीर्य लक्षात घेता संबंधित पोलिस पथके सीसीटीव्ही फूटेज, आसपासच्या व्यक्तींची चौकशी तसेच अलीकडील बेपत्ता तक्रारींचे रेकॉर्ड तपासत आहेत. महिला कोण आणि तिचा मृत्यू कशामुळे झाला याबाबतचे सर्व प्रश्न अजूनही अनुत्तरित आहेत.
मृत महिलेची ओळख किंवा घटनेविषयी कोणतीही माहिती उपलब्ध असल्यास त्वरित देहूरोड पोलिसांशी संपर्क साधावा असे आवाहन देहूरोड पोलीस ठाण्याचे पोलीस निरीक्षक विक्रम बनसोडे यांनी केले आहे.
प्रतिनिधी=गणेश नामदेव भेगडे.मो९९२१८०७०११
