निवडणूक निकालाच्या पार्श्वभूमीवर तळेगावात वाहतूक मार्गात बदल
तळेगाव दाभाडे : तळेगाव दाभाडे नगर परिषदेच्या सार्वत्रिक निवडणुकीच्या दुसऱ्या टप्प्याच्या निकालाच्या पार्श्वभूमीवर रविवारी दि. २१ डिसेंबर रोजी तळेगाव शहरातील वाहतूक व्यवस्थेत महत्त्वाचे बदल करण्यात आल्याची माहिती तळेगाव दाभाडे शहर वाहतूक पोलीस .सहाय्यक पोलीस निरीक्षक गणेश लोंढे यांनी दिली आहे.निकालाच्या दिवशी शहरात मोठ्या प्रमाणात गर्दी होण्याची शक्यता लक्षात घेता, कायदा व सुव्यवस्था तसेच नागरिकांच्या सुरक्षिततेसाठी हे बदल लागू करण्यात आले आहेत.
जिजामाता चौक ते तळेगाव स्टेशन चौक आणि तळेगाव स्टेशन चौक ते जिजामाता चौक या दोन्ही मार्गांवर सर्व प्रकारच्या वाहतुकीस पूर्णतः प्रवेशबंदी करण्यात आली आहे. या मार्गावरून जाणाऱ्या वाहनांनी जिजामाता चौक येथून खांडगे पेट्रोल पंप, बेटी बचाओ सर्कल, राज मेडिकल चौक, मारुती मंदिर चौक असा पर्यायी मार्ग वापरावा, असे आवाहन करण्यात आले आहे. स्टेशन चौकाकडून जाणाऱ्यांनी बीएसएनएल कॉर्नर, मंत्रा सिटी रोड, स्टार बाजार कॉर्नर, जुना मुंबई–पुणे महामार्ग व लिंब फाटा चौक मार्गे प्रवास करावा.
काळोखेवाडी ते नगरपरिषदेची नवीन इमारत तसेच आदर्श विद्यालय गेट ते नगरपरिषदेची नवीन इमारत या मार्गांवरही सर्व प्रकारच्या वाहतुकीस बंदी घालण्यात आली आहे. या भागातील वाहनचालकांनी वक्रतुंड बंगला कॉर्नर, आरोग्य आयुर्वेदिक क्लिनिक, बेटी बचाओ सर्कल किंवा श्रीनगरि कॉर्नर, हॉटेल ईशा कॉर्नर, जिजामाता चौक तसेच खांडगे पेट्रोल पंप मार्गे पर्यायी रस्ते वापरावेत.
वतननगर बाजूकडून हिंदमाता भुयारी मार्ग ते काका हलवाई कॉर्नर हा मार्गदेखील वाहतुकीस बंद राहणार आहे. या ठिकाणी स्वप्ननगरी जनसेवा वाचनालय, चाकण–तळेगाव महामार्ग, मराठा क्रांती चौक व तळेगाव स्टेशन चौक असा पर्यायी मार्ग निश्चित करण्यात आला आहे.
वाहतूक पोलिसांनी नागरिक, वाहनचालक व प्रवाशांनी दिलेल्या सूचनांचे पालन करून सहकार्य करावे, असे आवाहन केले आहे.
प्रतिनिधी=गणेश नामदेव भेगडे.मो९९२१८०७०११
