मुंबई पुणे द्रुतगती महामार्गावरील वाहतूक २३आणि २४ एप्रिल रोजी तात्पुरती बंद. पर्यायी मार्गाचा अवलंब करावा
पुणे : मुंबई–पुणे द्रुतगती मार्गावरून प्रवास करणाऱ्या वाहनचालकांसाठी महत्त्वाची सूचना देण्यात आली आहे. द्रुतगती मार्गावरील दुरुस्तीच्या कामांमुळे २३ व २४ एप्रिल रोजी दोन्ही दिशेची वाहतूक प्रत्येकी तीन तासांसाठी पूर्णपणे बंद ठेवण्यात येणार आहे. त्यामुळे प्रवाशांनी प्रवासाचे योग्य नियोजन करावे, असे आवाहन प्रशासनाकडून करण्यात आले आहे.
महाराष्ट्र राज्य रस्ते विकास महामंडळामार्फत (MSRDC) द्रुतगती मार्गावरील किमी ५८/५०० या ठिकाणी, डोंगरगाव–कुसगाव परिसरात पुलाच्या दुरुस्तीची कामे हाती घेण्यात आली आहेत. या अंतर्गत पुलावरील शटरिंग काढणे तसेच रंगकामाची प्रक्रिया पार पडणार आहे. ही कामे करताना सुरक्षिततेच्या दृष्टीने वाहतूक सुरू ठेवणे धोकादायक ठरू शकते. त्यामुळे खबरदारीचा उपाय म्हणून वाहतूक तात्पुरती पूर्णपणे बंद ठेवण्याचा निर्णय घेण्यात आला आहे.
प्रशासनाने दिलेल्या माहितीनुसार, २३ एप्रिल रोजी दुपारी १२ ते ३ या वेळेत मुंबईकडे जाणारी वाहतूक बंद राहील. तर २४ एप्रिल रोजी त्याच वेळेत पुण्याकडे येणारी वाहतूक पूर्णपणे थांबवण्यात येणार आहे. या कालावधीत कोणत्याही प्रकारची वाहतूक द्रुतगती मार्गावरून सुरू राहणार नाही.
वाहनचालकांच्या सोयीसाठी पर्यायी मार्गांची व्यवस्था करण्यात आली आहे. मुंबईकडे जाणाऱ्या वाहनांसाठी किवळे–देहूरोड–तळेगाव–राष्ट्रीय महामार्ग क्रमांक ४८ मार्गे कुसगाव टोलपर्यंत जाण्याचा पर्याय उपलब्ध करून देण्यात आला आहे. तर पुण्याकडे येणाऱ्या वाहनांसाठी कुसगाव टोल–राष्ट्रीय महामार्ग ४८–देहूरोड–किवळे मार्गे पुण्यात प्रवेश करण्याचा मार्ग सुचविण्यात आला आहे.
या बदलामुळे पर्यायी मार्गांवर वाहतुकीचा ताण वाढण्याची शक्यता आहे. विशेषतः दुपारच्या वेळेत वाहतूक कोंडी होण्याची शक्यता नाकारता येत नाही. त्यामुळे वाहनचालकांनी अतिरिक्त वेळ गृहित धरून प्रवास करावा, असे आवाहन करण्यात आले आहे. मालवाहतूक करणाऱ्या वाहनांनी तसेच लांब पल्ल्याच्या प्रवासासाठी निघालेल्या वाहनांनी वेळेआधीच मार्ग बदलणे आवश्यक ठरणार आहे.
प्रशासनाकडून नागरिकांना संयम राखण्याचे आणि वाहतूक पोलिसांच्या सूचनांचे पालन करण्याचे आवाहन करण्यात आले आहे. तसेच कोणतीही अडचण उद्भवल्यास तात्काळ मदत मिळावी यासाठी नियंत्रण कक्ष आणि महामार्ग पोलीस सज्ज ठेवण्यात आले आहेत. नियंत्रण कक्षाचा क्रमांक ९८२२४९८२२४ तर महामार्ग पोलिसांचा क्रमांक ९८३३४९८३३४ असा आहे.
दरम्यान, द्रुतगती मार्गावरील ही कामे प्रवाशांच्या सुरक्षिततेसाठी अत्यावश्यक असल्याचे प्रशासनाने स्पष्ट केले आहे. काही तासांचा हा तात्पुरता अडथळा भविष्यातील सुरक्षित आणि सुरळीत प्रवासासाठी महत्त्वाचा असल्याचेही सांगण्यात आले आहे. त्यामुळे नागरिकांनी सहकार्य करण्याचे आवाहन करण्यात आले आहे.
प्रतिनिधी :गणेश नामदेव भेगडे. ९९२१८०७०११
