वडगांव मावळ (ता.१८) — केशवनगर रेल्वे गेट काही तांत्रिक व देखभाल कामामुळे सलग तीन दिवस बंद ठेवण्यात आले आहे. त्यामुळे केशवनगर व सांगवी परिसरातील नागरिकांची मोठी गैरसोय होत असतानाच, नगरसेवक पंढरीनाथ ढोरे व नगरसेवक गटनेते दिनेश ढोरे, विक्की भोसले यांच्या पुढाकाराने श्री शितळादेवी मंदिराजवळील भुयारी मार्ग दुचाकी वाहनांसाठी मोकळा करण्यात आला. रेल्वे विभागाचे अधिकारी विजय चव्हाण यांच्या सहकाऱ्यांच्या उपस्थितीत ही कारवाई करण्यात आली. तसेच नगराध्यक्षा अबोली मयूर ढोरे यांनी जागेवर जाऊन पाहाणी केली
रेल्वे गेट बंद असल्याने कामगार, शेतकरी, विद्यार्थी, महिला व ज्येष्ठ नागरिकांना मोठ्या वळसा मार्गाने प्रवास करावा लागत होता. अशा परिस्थितीत वर्षानुवर्षे अडथळ्यात अडकलेला भुयारी मार्ग अवघ्या तासाभरात खुला करण्यात आल्याने नागरिकांना तात्काळ दिलासा मिळाला आहे.
या मार्गासाठी केशवनगर भागातील रहिवासी सुमित कदम यांनीही प्रत्यक्ष सहकार्य केले. स्थानिकांच्या मागणीला प्रतिसाद देत लोकप्रतिनिधी व रेल्वे प्रशासनाने समन्वयातून तत्काळ निर्णय घेतल्याने परिसरातील वाहतूक सुरळीत झाली आहे.
भुयारी मार्ग खुला झाल्याने केशवनगर–सांगवीदरम्यान दुचाकी वाहनांचा प्रवास सुलभ झाला असून वेळेची बचत होत आहे. रेल्वे गेट बंद असतानाच्या काळात हा मार्ग अत्यंत उपयुक्त ठरणार असून नागरिकांनी लोकप्रतिनिधी व रेल्वे प्रशासनाचे तसेच नगरपंचायतीचे आभार व्यक्त केले आहेत.
