वडगाव नगरपंचाय मतदार यादीत दुबार नावे; नागरिकांना अर्ज नोंदविण्याचे आवाहन
वडगाव (ता. मावळ) — वडगाव नगरपंचायतच्या सार्वत्रिक निवडणुकीसंदर्भात दिनांक ८ ऑक्टोबर २०२५ रोजी प्राथमिक मतदार यादी प्रसिद्ध करण्यात आली होती. राज्य निवडणूक आयोगाच्या मार्गदर्शनानुसार आणि प्राप्त तक्रारींच्या आधारे निवडणूक आयोगाने त्या यादीची प्राथमिक चौकशी केली असता, काही मतदारांची नावे एकापेक्षा अधिक वेळा नोंद झाल्याचे निदर्शनास आले आहे.
या पार्श्वभूमीवर वडगाव नगरपंचायतच्या कार्यालयात तसेच अधिकृत संकेतस्थळावर https://mahaulb.in येथे २९ ऑक्टोबर २०२५ पासून दुबार नोंद असलेल्या मतदारांची स्वतंत्र यादी उपलब्ध करून देण्यात आली आहे.
नागरिकांना आवाहन करण्यात आले आहे की, ज्यांची नावे या यादीत आहेत त्यांनी कोणत्या प्रभागात मतदान करायचे आहे याबाबत आपला लेखी अर्ज व आवश्यक रहिवासाचा पुरावा ३० ऑक्टोबर २०२५ रोजी दुपारी ३ वाजेपर्यंत वडगाव नगरपंचाय कार्यालयात सादर करावा. अशी माहिती मुख्याधिकारी डॉ प्रविण निकम यांनी दिली.
राज्य निवडणूक आयोगाने स्पष्ट केले आहे की, मतदार यादीतील अचूकता आणि पारदर्शकता राखण्यासाठी ही प्रक्रिया राबविण्यात येत आहे. नागरिकांनी वेळेत आपले दावे आणि आक्षेप नोंदवावेत, असे आवाहन प्रशासनाने केले आहे.
