वडगाव मावळ न्यायालयाला अत्याधुनिक इमारतीची मंजुरी
वकिलांच्या सातत्यपूर्ण पाठपुराव्याला यश – न्यायप्रक्रियेला नवे बळ
वडगाव मावळ (प्रतिनिधी): वडगाव मावळ न्यायालयासाठी अत्याधुनिक इमारत उभारण्यास अखेर हिरवा कंदील मिळाला असून या निर्णयामुळे वकिलांमध्ये आणि नागरिकांमध्ये मोठ्या समाधानाची लाट उसळली आहे. न्यायालयीन कामकाजासाठी आवश्यक सुविधा वाढवण्याची मागणी गेल्या अनेक वर्षांपासून होत होती. नव्या इमारतीमुळे न्यायप्रक्रियेची गती वाढेल, सोयीसुविधा उन्नत होतील आणि प्रलंबित खटल्यांचे निवारण जलदगतीने होण्यास मदत होईल, असा विश्वास व्यक्त केला जात आहे.
वकिलांच्या सातत्यपूर्ण प्रयत्नांना यश
या मंजुरीसाठी वडगाव मावळ बार असोसिएशनने सातत्याने पाठपुरावा केला. अध्यक्ष ॲड. प्रताप शेलार, उपाध्यक्ष ॲड. शैलेश पडवळ, सचिव ॲड. अमोल दाभाडे, ॲड. आकाश ढोरे, ॲड. हर्षद देशमुख यांच्यासह संपूर्ण कार्यकारिणीने एकजुटीने पुढाकार घेतला. माजी अध्यक्ष ॲड. रविंद्र दाभाडे, ॲड. राजेंद्र गाडे पाटील, ॲड. निलीमा खिरे, ॲड. संजय वांद्रे, ॲड. यशवंत गोरे यांचे मोलाचे सहकार्य मिळाले. तसेच सर्व सहकारी वकिलांचा पाठिंबा आणि ज्येष्ठ वकिलांचे मार्गदर्शन या प्रक्रियेत निर्णायक ठरले.
अध्यक्ष ॲड. प्रताप शेलार यांनी भावना व्यक्त करताना सांगितले की,
“वडगाव मावळ न्यायालयाच्या अत्याधुनिक इमारतीची आवश्यकता गेली अनेक वर्षे भासत होती. अखेर या कामाला मंजुरी मिळाल्याने न्यायप्रक्रियेचा नवा अध्याय सुरू होईल. या यशामध्ये सर्व वकिलांचे योगदान आणि वरिष्ठांचे मार्गदर्शन महत्त्वाचे आहे.”
उपाध्यक्ष ॲड. शैलेश पडवळ यांनी सांगितले की,
“या इमारतीमुळे न्यायालयीन कामकाज सुलभ होईल, आधुनिक सुविधा उपलब्ध होतील आणि प्रलंबित खटले जलदगतीने निकाली निघतील. हे यश हे केवळ आमचे नसून संपूर्ण वकिल बांधवांचे आहे.”
नव्या इमारतीच्या सुविधा
या नव्या न्यायालयीन इमारतीत आधुनिक तंत्रज्ञानाचा वापर होणार आहे. वकिलांसाठी कार्यक्षम कार्यालयीन व्यवस्था, प्रगत दस्तऐवज व्यवस्थापन प्रणाली, सुनावणीसाठी डिजिटल सुविधा, पुरेसा व प्रशस्त न्यायालयीन कक्ष, तसेच नागरिकांसाठी सोयीस्कर वातावरण उपलब्ध करून दिले जाणार आहे. या सुविधांमुळे न्यायालयीन कामकाजाला नवे बळ मिळेल व न्यायप्रक्रिया अधिक वेगवान, पारदर्शक आणि परिणामकारक होईल, असा विश्वास व्यक्त केला जात आहे.
न्यायप्रेमींसाठी दिलासादायक पाऊल
वडगाव मावळ न्यायालयाच्या या निर्णयामुळे न्यायप्रेमी नागरिकांना दिलासा मिळाला असून संपूर्ण परिसरातील न्यायदान प्रक्रियेवर सकारात्मक परिणाम होणार आहे. वकिलांच्या अथक परिश्रमांना मिळालेले हे यश केवळ वकिल बांधवांसाठीच नव्हे तर सर्वसामान्य जनतेसाठीही दिलासादायक ठरणार आहे.
