कान्हे फाटा येथे टँकरमधून पांढरे रॉकेल चोरी – एकाला अटक, दोघे फरार
कान्हे (ता. मावळ) : कान्हे फाटा येथे टँकरमधून पांढरे रॉकेल चोरी करत असताना वडगाव मावळ पोलिसांनी कारवाई करून एकाला अटक केली असून त्याचे दोन साथीदार मात्र घटनास्थळावरून फरार झाले आहेत. ही घटना २६ ते २७ ऑगस्ट २०२५ या कालावधीत कान्हे फाटा येथील सूर्या ढाबा परिसरातील पार्किंगमध्ये घडली.
पोलिसांनी दिलेल्या माहितीनुसार, अटक करण्यात आलेला आरोपी हा टँकर चालक असून त्याने आपल्या साथीदारांच्या मदतीने मुंबई-पुणे महामार्गावरील सूर्या ढाब्याजवळ उभ्या असलेल्या टँकरचे सील तोडून टँकरमधून पांढऱ्या रंगाचे रॉकेल चोरी करण्याचा प्रयत्न केला. गुप्त माहितीच्या आधारे पोलिसांनी धाड टाकून कारवाई केली असता एकाला ताब्यात घेतले, तर इतर दोघे आरोपी अंधाराचा फायदा घेऊन पसार झाले.
या प्रकरणी गंगाराम कोंडीबा इंगळे (रा. घाटकोपर) यांनी वडगाव मावळ पोलिस ठाण्यात फिर्याद दिली आहे. त्यावरून पोलिसांनी नागेश लक्ष्मण शिंदे (वय ३८, रा. घणसोली, नवी मुंबई) याला अटक केली असून त्याच्या इतर दोन फरार साथीदारांवर देखील गुन्हा दाखल करण्यात आला आहे.
या प्रकरणाचा पुढील तपास वडगाव मावळ पोलीस करत आहेत.
प्रतिनिधी – गणेश नामदेव भेगडे, ९९२१८०७०११
