कामशेत ग्रामपंचायतीचा भोंगळ कारभार – सफाई कर्मचाऱ्यांचे दोन महिन्यांचे वेतन गायब
कामशेत(मावळ): कामशेत(खडकाळे) ग्रामपंचायतीत सुरू असलेल्या भोंगळ कारभाराचा आणखी एक काळा अध्याय प्रकाशात आला आहे. गाव स्वच्छ ठेवण्याची जबाबदारी ज्यांच्या खांद्यावर आहे, त्या सफाई कर्मचाऱ्यांनाच दोन महिन्यांचा पगार मिळाला नसल्याने त्यांच्यावर दिवाळखोरीची वेळ आली आहे. एकीकडे ग्रामपंचायत विकासाच्या मोठमोठ्या घोषणा करते, तर दुसरीकडे मेहनती कर्मचाऱ्यांना मिळायला हवे ते मूलभूत मानधनही थांबवले जाते, ही मोठी विडंबना आहे.
सफाई कामगार दररोज पहाटेपासून गावातील गल्लीबोळ स्वच्छ करण्यासाठी आपले आरोग्य, वेळ आणि श्रम झिजवत असतात. कचऱ्याच्या ढिगाऱ्यातून स्वच्छतेचा मान राखणारे हेच कामगार आज आपल्या मुलांच्या घरखर्चासाठीही पैसे नसल्याने हतबल झाले आहेत. “काम नियमित, पगार अनियमित—हीच आमची अवस्था,” असे कामगारांचे दुःख शब्दांत मावत नाही.
ग्रामपंचायतीचे अधिकारी नेमके कोणत्या कारणामुळे वेतन थांबले यावर भाष्य करायला तयार नाहीत. निधीअभावाचे ढोंग, प्रशासकीय फाइलांची हवालदिल स्थिती आणि जबाबदारी एकमेकांवर ढकलण्याचा खेळ—हेच तेच जुने चक्र. कामशेतमध्ये मात्र याचा फटका थेट कष्टकरी वर्गाला बसतो आहे.
ग्रामस्थांचाही संयम आता सुटू लागला आहे. “गाव स्वच्छतेवर चालते, स्वच्छता कामगारांवर गाव चालते; मग त्यांनाच उपाशी ठेवण्याचा हा प्रकार कसला?” असा सवाल लोकांनी उपस्थित केला आहे. ग्रामपंचायतीने तत्काळ या कामगारांचे थकीत वेतन अदा करावे आणि भविष्यात अशी वेळ पुन्हा येऊ नये यासाठी ठोस पावले उचलावीत, अशी सर्वत्र मागणी होत आहे.
प्रतिनिधी=गणेश नामदेव भेगडे.मो९९२१८०७०११
