वडगाव फाट्यावर तातडीने सिग्नल सुरू करा; वाहतुकीवर निर्बंधांची शिवसेनेची मागणी १५ दिवसांचा अल्टीमेट
वडगाव मावळ : वाढत्या वाहतूक कोंडीने हैराण झालेल्या वडगाव फाटा परिसरात आता संताप उसळू लागला आहे. स्थानिकांच्या जीवावर बेतणाऱ्या या वाहतूक गोंधळावर तात्काळ तोडगा काढावा, अन्यथा तीव्र आंदोलन छेडले जाईल, असा थेट इशारा शिवसेना उद्धव बाळासाहेब ठाकरे, महाराष्ट्र वाहतूक शिवसेना आणि शिवसेना मावळ तालुका यांच्या वतीने देण्यात आला आहे.
या पार्श्वभूमीवर वडगाव पोलीस स्टेशन येथे ठाणे अंमलदार काळे यांना निवेदन सादर करण्यात आले. वडगाव फाटा चौकात तातडीने सिग्नल यंत्रणा कार्यान्वित करावी, तसेच सकाळी ७ ते सायंकाळी ७ या कालावधीत जड वाहतुकीवर निर्बंध घालावेत, अशी मागणी निवेदनात ठळकपणे करण्यात आली. या मागण्यांकडे दुर्लक्ष झाल्यास पुढील १५ दिवसांत आंदोलनाचा मार्ग अवलंबला जाईल, असा अल्टिमेटमही देण्यात आला आहे.
वडगाव फाटा हा मावळ तालुक्यातील अत्यंत वर्दळीचा आणि अपघातप्रवण चौक बनला असून, दररोजच्या वाहतुक कोंडीमुळे नागरिक त्रस्त झाले आहेत. शाळकरी मुले, कामगार आणि प्रवासी यांना जीव मुठीत धरून रस्ता ओलांडावा लागत असल्याची गंभीर स्थिती आहे. प्रशासन मात्र याकडे डोळेझाक करत असल्याचा आरोप शिवसेनेच्या पदाधिकाऱ्यांनी केला.
यावेळी महाराष्ट्र वाहतूक सेना पुणे जिल्हाध्यक्ष दत्तात्रय घुले, भरत भोते, अवधूत चव्हाण, सतीश गरुड, संगीताताई सोनवणे, अनिल ओव्हळ, रमेश जाधव, युवराज सुतार, पोपट राक्षे, संदीप बालघरे, मोरेश्वर घाडगे, रवींद्र गायकवाड आणि पांडुरंग पाटील उपस्थित होते. प्रशासनाने तातडीने ठोस पावले उचलावीत, अन्यथा रस्त्यावर उतरून न्याय मिळवावा लागेल, असा इशारा यावेळी देण्यात आला.
प्रतिनिधी :गणेश नामदेव भेगडे. ९९२१८०७०११
