तळेगाव स्टेशन परिसरातील तळ्यात पुन्हा युवकाचा मृतदेह दोन दिवसांत दुसरी घटना, परिसरात चर्चांना उधाण
तळेगाव दाभाडे (प्रतिनिधी):
तळेगाव स्टेशन परिसरातील तळ्यात पुन्हा एक मृतदेह आढळून आला असून त्यामुळे परिसरात मोठी खळबळ उडाली आहे. आदेश उर्फ मंगेश बोराटे (वय अंदाजे 27 वर्षे) असे मृत तरुणाचे नाव असून, दोन दिवसांपूर्वी याच ठिकाणी एका २२ वर्षीय मुलीचा मृतदेह सापडल्याची घटना घडली होती.
सलग दोन दिवसांत एकाच ठिकाणी दोन मृतदेह आढळल्याने नागरिकांमध्ये चर्चेला उधाण आले आहे. ही फक्त योगायोगाची घटना आहे की यामागे काही गंभीर गुन्हा दडलेला आहे, याबाबत पोलीस यंत्रणा तपास करत आहे.
पोलिसांचा तपास सुरू
मृत तरुण आणि दोन दिवसांपूर्वी मृतावस्थेत सापडलेल्या तरुणीचे परस्पर संबंध काय होते, ते एकमेकांना ओळखत होते का, याचा शोध घेतला जात आहे. मृत्यूचे कारण आत्महत्या आहे की काही वेगळा गुन्हा यामागे दडलेला आहे, हे समजून घेण्यासाठी पोलीस अधिक माहिती गोळा करत आहेत.
घटनास्थळी तळेगाव पोलीस ताफा दाखल झाला असून, परिसरात बंदोबस्त तैनात करण्यात आला आहे. दरम्यान, मृतदेह उत्तरीय तपासणीसाठी (पोस्टमार्टेम) पाठविण्यात आला आहे.
नागरिकांमध्ये चर्चांना ऊत
एकाच ठिकाणी सलग दोन मृतदेह सापडल्याने स्थानिक नागरिकांमध्ये भीतीचे वातावरण निर्माण झाले असून या घटनांबाबत विविध चर्चांना ऊत आला आहे. या दोन्ही मृत्यूमागील सत्य लवकरच उघड होईल, अशी अपेक्षा नागरिकांकडून व्यक्त केली जात आहे.
