नो पार्किंग क्षेत्र उरले नावालाच नो पार्किंगच्या फलकाखाली वाहने पार्क. पोलिसांचे दुर्लक्ष
तळेगाव दाभाडे : शहरातील स्टेशन परिसरातील मुख्य वर्दळीचा रस्ता असणारा मार्ग तळेगाव जनरल हॉस्पिटल ते छत्रपती शिवाजी महाराज चौक या मार्गावर रेल्वे स्टेशन बाहेर नो पार्किंग फलक लावण्यात आला असून नागरिकांकडून नियमांना केराची टोपली दाखवली जात आहे. चक्क नो पार्किंग फलका खालीच वाहने पार्क केलेली दिसत आहे.
यामुळे मोठ्या प्रमाणात अडचणी निर्माण होत आहे. तळेगाव रेल्वे प्लॅटफॉर्मवर जाण्यासाठी व येण्यासाठी याच मार्गाचा वापर होत असतो. रेल्वे प्लॅटफॉर्मवर जाणाऱ्या प्रवेशद्वारासमोरच दुचाकी व चार चाकी वाहने पार्क केली जात आहे. अशा वाहनांमुळे प्रवाशांना व येथून जाणाऱ्या वाहनांना वाहतूक कोंडीचा सामना करावा लागत आहे.
१० मीटर अंतरावर अधिकृत पार्किंग स्टॅन्ड असून देखील अनेक नागरिक बिनधास्त पणे नो पार्किंगच्या फलका जवळच वाहने पार्क करून निघून जातात. या बेशिस्त वाहन लावणाऱ्या नागरिकांमुळे हा रस्ता अरुंद झाला असून या रस्त्याने दोन्ही बाजूने जाणाऱ्या वाहनांना अडचणी निर्माण होत आहे.
अनाधिकृतपणे पार्क केलेल्या वाहनांवर प्रशासन तसेच वाहतूक पोलीस लक्ष देत नाही नो पार्किंग क्षेत्राचे फलक नावालाच लावले की काय असा प्रश्न नागरिक उपस्थित करत आहे. नो पार्किंगच्या क्षेत्रामध्ये वाहने उभी करणाऱ्यांवर दंडात्मक कारवाई करावी अशी मागणी शहरातील अनेक नागरिकांनी केली आहे.
प्रतिनिधी =गणेश नामदेव भेगडे. ९९२१८०७०११
